Accessibility links

якшәмбе, 4 декабрь 2016, Казан вакыты 13:22

Kosovonıñ bäysezlek iğlan itüe bar dönyada bu waqiğa tiräsendä süz köräşen tudırdı. Serbiä Kosovonıñ bäysezlegen xuplağan başqalalardan, şul isäptän Washington, London, Parij, Ankaradan, ilçelären çaqırtıp aluın belderde. Andıy illär sanı arta bara.


"Kosovonıñ bäysezlege mäsäläsendä bez Rusiä, Yewropa häm başqa illär belän bik tığız eşlibez. Qarşılıqlar bar, läkin bez dä, küp kenä başqa illär dä şul fikerdä: tarix monıñ döres adım ikänen, Balkanğa solıx kiterü ikänen äle isbatlar."

Şuşı süzläre belän amerikan prezidentı George Bush Kosovonıñ bäysezlegenä xuplaw belderde. Bu süzlären ul Afrikada säfär yörgändä, Tanzaniägä kilgäç äytte.

Waşington Kosovonı berençelärdän bulıp tanıdı. Düşämbedä bu adımğa Britaniä, Fransiä, Germaniä, İtaliä quşıldı.

Kosovonı tanığan illär arasında şulay uq Albaniä, Törkiä, Äfğanstan da bar.

İslam konferensiäse oyışması da Priştinanıñ adımın xuplap qarşıladı. Oyşma başlığı Äqmäletdin İhsanoğlı, Kosovonıñ bäysezlege islam dönyasına faydağa bulaçaq, dip belderde.

Dönyanıñ ber öleşe yaña tuğan däwlätne xuplap qarşı alsa, başa illär moña qırın qarıy. Äytergä kiräk, nigezdä bu separatist töbäkläre bulğan illär.

Bask separatislarına qarşı köräşkän İspaniä Kosovonı tanımayaçağın belderde.

Romaniä dä şulay eşläde. Buxarestnıñ moña üz säbäpläre bar: Serbiä belän elektän kilgän yaxşı mönäsäbätlär, Transilvaniä töbägendä macar mäxälläse häm dä qärdäş Moldovadağı seperatist Dnestr buyı töbäge.

Kıprısnıñ da Kosovonı ni öçen tanımawı añlaşıla. Häm dä Azärbaycan, Gruziä, Şri Lanka, Qıtay – bu illärneñ barısınıñ da üz "qaynar" töbäkläre bar.

Şulay da, Kosovonıñ bäysezlegenä qarşı iñ köçle tawış Mäskäw kirmännenän yañğırıy. Rusiäneñ BMOdağı ilçese Vitaliy Çurkin monı "xalıqara qanun prinsipların sanğa suqmaw" dip atadı häm Serbiäneñ bötenlegen qaytarırğa taläp itte.

"BMOnıñ Kosovodağı wäkile Kosovo xakimiätläreneñ beryaqlı deklaratiäsen qanunsız dip iğlan itüen taläp itäbez" dide Rusiä räsmie.

Çeçen separatislarına qarşı ike suğış suğışqan Mäskäw ber yaqtan, beraylqı deklaratsiälärne tanımawın beldersä, ikençe yaqtan, Gruziä häm Moldovadağı separatist töbäklärne xuplawın yäşermi.

Serbiädä isä Kosovonıñ bäysezlege uñayınnan açu xisläre sürelmi.

"8 yıl ütügä, xäzer inde demokratik häm tınıçlıq söygän Serbiäne yänä kimsettelär, bu yulı ciren tartıp alıp. Monı aqıl belän dä, qanun belän dä añlap ta, añlatıp ta bulmıy" dide Serbiä prezidentı Boris Tadiç BMO mönbärennän.

Serbiäneñ töp säyäsi firqäläre pänceşämbe könne "Kosovo – ul Serbiä" dip atalğan kiñ külämle qarşılıq çarası ütkärergä cıyına.


XS
SM
MD
LG