Accessibility links

чәршәмбе, 7 декабрь 2016, Казан вакыты 19:33

Bügen irtän iğlan itelgän räsmi näticälärgä qarağanda, Ärmänstandağı prezident saylawınıñ berençe turında Serj Sarkisian ciñep çıqtı. Läkin oppozisiä näticägä qarşı çığa.


Ärmänstan saylaw komissiäse bügen yasağan räsmi belderüendä: “Barlıq tawışlar sanaldı häm Ärmänstan demokratia partiäse namzäte, Serj Sarkisian ciñde” dip iğlan itte. Sarkisian kiçä bulğan saylawdan yaqınça 53 %lıq tawışnı yawlap berençe turda ciñep çıqtı.

Sarkisiannıñ köndäşe elekke prezident Ter Petrosyan isä, tawışlarnıñ 21.5 % gına aldı. Elekke parlament süzçese namzät Artur Bağdasarian isä 3. urında, 16.6 %lıq tawışnı aldı.

Ter Petrosyan saylaw barışında tärtip bozıluın däğwä itep, yaqlawçıların bügen Yerevanda protest çaralarına qatnaşırğa çaqırdı. Ul bu ğayepläwne üze tawış bergändä uq yasağan ide. Ber jurnalistneñ tawış birü barışınnañ sez qanäğatme digän sorawına ul,

“Yuq, miña kilgän mäğlümätkä qarağanda, bik qarañgı eşlär bara.” ..dip cäwap berde.

Näticägä qaraganda Sarkisian belän Ter Petrosyan arasında tawış ayırması zur.

Üzäk saylaw komissiäse iğlan itkän näticädän soñ, saylawnıñ ğadellege turında Könbatışlı küzätüçelär dä bügen kötelgän belderüen yasadı. Yewropanıñ iminlek häm xezmättäşlek oyışmasınnan kilgän 600 küzätüçe bügen yasağan urtaq bilderüendä: “Ärmänstandağı prezident saylawı ğomum alğanda ğadel uzdı” diyelä. Läkin borçılularnı kimeter öçen kübräk alğarışqa ixtiyaç buluına da basım yasadı.

Ter Petrosyannı yaqlağan 2 meñlägän tarafdar, üzäk saylaw komissiä binasına yaqın, üzäk mäydänanında cıyıldı. Komissiä binası isä bik köçle saqlana, binanın aldı köçle timer kirtälär belän ürelgän häm distälägän polisiä binanı saqlıy.

Saylawda tärtip bozıluı turında şikayät beldergän Orinats yerkir partiäsenän namzät, Bağdasarian da bu qarşılıq çaralarına qatnaşırmı älegä bilgele tügel.

Xaqimiät idaräse tärtip bozıldı digän şikäyätne qatğıy inqar itä.

XS
SM
MD
LG