Accessibility links

якшәмбе, 4 декабрь 2016, Казан вакыты 00:56

Pakıstanda düşämbe könne uzğan saylawda ike oppozisiä partiäse, Bhuttonıñ Pakıstan xalıq partiäse belän elekke premyer Nawaz Şärifneñ Pakıstan möselman berlege partiäse küpçelek tawış belän saylawda cinep çıqqan ide. Xäzer bu ike partiä arasında parlamenttä koalisiä buldıru öçen söyläşülär başladı.


Saylawda ciñep çıqqan Pakıstan xalıq partiäse häm küpçelek tawışnı alğan Nawaz Şärif partiäse berläşergä cıyınğanda bu koalisiänıñ Prezident Möşärräf xaqimiätenä bulaçaq tä’sere turında bäxäslär arta başladı. Şulay uq Pakıstannıñ terrorçılıq belän köräş säyäsäteneñ kiläçägedä soraw astında qala.

Parlament saylawında küpçelek tawş belän ciñep çıqqan ike oppozisiä partiäsennän wäkillär, bügen koalisiä buldıru öçen bergä cıyıldı. Partiä wäkilläre, sekulär bulğan Awami milli partiäse belän Pashtun partiäsenen dä koalisiädä zur rol uynayaçağın belderde.

Binäzer Bhutto üterelgännäñ soñ partiä başlığı itep Bhuttonıñ ire, Asıf Ali Zärdari saylanğan ide. Läkin ul premyerlıq wazifasına kilergä cıyınmawın, monıñ öçen partiä tarafınnañ başqa ber namzät bilgelänäçägen bilderde. Korupsiädä ğayeplägän öçen törmädä utırğan Asıf, deputat bula almıy şul säbäble ul premyer dä bula almıy.

Bügen Pakıstan matbuğatı, premyer wazifası öçen Pakıstan xalıq partiäse başlığı yärdämçese Mäxdüm Ämin Fähimneñ kilüe bik ixtimal dip belderde.

1999 yılda Möşärräfnen xaqimiätkä kilüe belän wazifasınnan alıngan Nawaz Şärif, Pakıstanda diktatorlıqnı beterü öçen barlıq säyäsi partiälärne bergä berläşergä çaqırdı.

“Xalıq saylawda oppozisiäne saylaw belän Möşärräfne xökem itte, läkin ul monı ber dä töşenä almadı. Ul küzen yomıp xaman: Xalıq minem qayçan kitüemne teläsä min şunda kitäçäkmen dip äytä. Menä xalıq inde närsä telägänen aña kürsätte.”


Möşärräf isä, üz möddäte betkänçegä qadär wazifada qalaçağın häm yaña xökümät belän dä bergä eşläyäçägen äytä. AQŞ ta şul isäptän yaña xökümätneñ Möşärräf belän eş itüen ömet itä.

Waşiñton öçen Pakıstan, terorçılıq belän köräştä möhim illärdän berse. İlneñ Äfğan çigenä yaqın qabilä cirläre, Taliban häm äl-Qaidä suğışçıları öçen sıyınu urnı bulıp qala, şul isäptän farazlarga qarağanda Osama bin Ladin öçen dä. Äfğan çige yaqınnarında xärbi köçlärgä qarşı bulğan intixar höcüme häm qanlı bäreleşlär, aylar buyına äle dä däwam itä. Bu xäl Äfğanstan xaqimiäten gel borçıy. Songı yıllarda bulğan bäreleşlär Pakıstan xalıqın da tuydırğan häm xäzer alar da yaña xökümätneñ bu mäsälä buyınça eş itüen teli.

“Bu terror Pakıstanğa da qarşı, häm bez anıñ belän üzebezneñ suğış kebek köräşäçäkbez.”

İnde Pakıstan xalıq partiäse başlığı Asif Ali Zardari süzlärennäñ añlaşılğança, yaña xökümät tä terrorçılıqqa qarşı torunı däwam itteräçäk.

Läkin yaña xökümät il eçendä iminlek mäsäläsendä nindi säyäsät alıp baraçaq, bu zur soraw.

XS
SM
MD
LG