Accessibility links

Кайнар хәбәр

Serbiä Kosovonı cibärergä telämi


Serbiäneñ elekke xärbi başlığın kigän serb qarşılıq çarasına bara
Serbiäneñ elekke xärbi başlığın kigän serb qarşılıq çarasına bara

Pänceşämbe Belgradta Kosovonıñ bäysezlegenä qarşı zur protest çarası ütte. Serbiäneñ törle töbäklärennän başqalağa yözlägän meñ keşe cıyılğan. Xakimiätlär alarnı buşlay transport belän täemin itkän.


Pänceşämebe könne Belgradqa buşqa barıp bula ide. Serb räsmiläre başqalağa baruçı poezd, avtobuslarğa tüläwsez utıru mömkinlege birde. Kosovonıñ bäysezlegenä protest belderü çarasında balalarğa da qatnaşu mömkinılege birü öçen mäktäplärdä yal köne iğlan itelde.
Serb xanımı "Amerikanı açqan öçen ... sine Kolumb" digän şiğär totqan

Çärşämbedä Strassburgta Yewropa parlamentı komitetında yasağan çığışında Serbiäneñ tışqı eşlär ministrı Vuk Jeremiç, Belgrad Kosovo mäsäläsen tınıç yul belän xäl itergä çaqıruın däwam itä dip belderde.

Tınıç qarşılıq çaraları dip atalsa da, alar köç qullanuğa kiterergä mömkin digän şöbhälär bar. Serbiä ministrınıñ süzläre bu şöbhälärne kimetä almadı.

"Serbiädä wazğiät bik kierenke. Uramğa küp keşe çığır dip kötelä. Älbättä, tärtip häm tınıçlıq saqlaw öçen bez qulıbızdan kilgänne eşliyäçäkbez. Läkin bu ciñel bulmayaçaq" dide Serbiä tışqı eşlär ministrı.

Qarşılıq çaraları Serbiädä genä tügel, ä serblar yäşägän başqa töbäklärdä dä ütä, misal öçen, Çernogoriädä.

Sişämbedä açulı serblar Kosovo belän Serbiä çigendä ike tikşerü urınına ut törte. Yäkşämbe häm düşämbedä Belgradtağı Törkiä häm amerikan ilçeleklärenä taşlar atıldı, Sloveniä ilçelegenä zıyan kile.

Serbiäneñ infrastruktura ministrı Velimir İliç monı yäşlärneñ "qarşılıq belderüe", "demokratiäneñ ber öleşe" dip atadı.

"Amerikan ilçelegenä taş atqannar imeş, monı böten cirdä eşlilär. Alarğa ğına kizänergä dimägän. Äyterseñ, ilneñ ber öleşen qayırıp alu xuliganlıq tügel, ä ilçelek täräzäsenä taş atu - xuliganlıq" dide Serbiäneñ infrastruktura ministrı.
Serbiä-Kosovo çigendä NATO saflarındağı fransuz xärbiläre

Londonda urnaşqan Amnesty İnternational oyışması bu qarşılıq çaraları, köç qullanuğa äwerelep, keşeleräneñ tormışın qurqınıç astına quyarğa mömkin dip kisätte häm Serbiä räsmilären çaralar kürergä çaqırdı.

Prezident Boris Tadiç häm premier-ministr Voytslav Koştunitsa, xalıqnı bügenge qarşılıq çarası waqıtında tınıçlıq saqlarğa çaqırdılar.

Yewropa Berlegeneñ Kosovodağı maxsus wäkile Piter Feyt isä bäysezlek iğlan itkän töbäktäge serblarnı annan kitmäskä häm tınıç bulırğa öndäde.

"Kosovodağı serblarnıñ monda qalıp, başqa watandaşlar belän töbäkneñ kiläçäge xaqına bergäläp eşlärgä tulı xoquqı bar. Bez Kosovo xökümäte belän alarğa monı citkerergä tieş" dide Yewropa Berlege wäkile.

Ul arada, bügen berniçä yöz keşe çik aşa Serbiädän Kosovoğa ütep kerergä tırışqan. Kosovo politsiäse alarnı ütkärmägän. Protest belderüçelärne tınçılandıru öçen anda berniçä yöz NATO xärbie kiterelgän, dielä.

XS
SM
MD
LG