"Cil çäçkän dawıl urır" digän mäqäl bar.
Serb räsmiläre açu xislärenä birelep, tieşle iminlek çaraları kürmiçä, xalıqnı uramğa çığarıp, xata eşläde bulsa kiräk.
Uzğan töndä dönya telekompaniäläre Belgrad uramnarınnan tamaşa kürsätte. Salmış xäldä, yarsığan yäşlär amerikan häm başqa illärneñ ilçeleklärenä ut törtte, täräzälär wattı, kibetlär taladı.
Amerikan ilçelege binasında soñnan ber mäyet tabılğan. Anıñ kem ikäne älegä açıqlanmağan. Amerikan räsmiläre ilçelek xezmätkärläre barısı da isän di. Ul höcümçelärneñ berse bulırğa mömkin dilär.
Uram çualışlarında yaralanğan 150läp keşe xastaxanägä kiterelgän, şul isäptän, 30ğa yaqın politsiä xezmätkärläre häm jurnalistlar.
Serb räsmiläre xäzer ükeneç belderä. "Belgradta bulğan xällär bik ükeneçle. Läkin bu mitingta qatnaşqan yözlägän meñ keşe tügel, ä ber törkem ekstremistlar eşe", - dide tışqı eşlär ministrı Vuk Yeremiç.
Şuşı tärtipsezleklär arqasında yözlgän meñ keşe qatnaşqan qarşılıq çarası külägädä qaldı.
Quşma Ştatlar däwlät sekretare Nicholas Burns Serbiä premier-ministrı Vojislav Koştunitsağa şaltıratıp mondıy xällärne başqa buldırmasqa çaqırdı.
"Serbiä xökümäte, xalıqara qanun nigezendä, diplomatik qorılmalarnı, şul isäptän ilçeleklärne saqlarğa tieş", - dide AQŞnıñ BMOdağı ilçese Zalmay Xälilzad.
BMOnıñ İminlek Şurası bu höcümnärgä tänqit belderde, diplomatik missiälärneñ qağılğısızlıq prinsibın bozu dip atadı.
Yewropa Berlege ilçeleklärne saqlaw öçen Serbiäne qulınnan kilgänen eşlärgä çaqırdı.
Serb räsmiläre tieşle çaralar kürmäsä, bu köç qullanular töbäkneñ başqa urınnarına, berençe çiratta Kosovoğa taralırğa mömkin digän borçular bar.
Serb xökümäteneñ tieşle çaralar kürmäwe dä sorawlar uyattı. Serbiäneñ eçke eşlär ministrlığı amerikan ilçelegennän berniçä yöz metr yıraqlıqta ğına urnaşqan. Läkin politsiägä anda kilep citer öçen yartı säğättän artıq waqıt kiräk buldı. Yarsığan yäşlär binağa ut törtep ölgergän ide inde.
Serb räsmiläre üzläreneñ ölgermäwen protest belderüçelärneñ artıq küp buluı belän añlattı.
Ämmä Serb xökümäte buldıra almağanmı, ällä telämägänme, digän soraw barıber açıq qaldı.