Accessibility links

шимбә, 3 декабрь 2016, Казан вакыты 22:54

Rusiäneñ kiläse prezidentı bulıp dip kötelgän Dmitriy Medvedev düşämbedä ber könlek säfär belän Belgradqa kilde. Serb räsmilärenä ul Rusiäneñ Kosovo mäsäläsendä säyäsäte üzgärmäyäçägen belderde.


Bu yäkşämbedä Rusiäneñ kiläse prezidentı bulıp saylanır dip kötelgän Dmitriy Medvedev, saylaw näticälären kötep tormıyça, düşämbedä räsmi säfärenä çığıp kitte.

Räsmi töstä iqtisad häm energetika mäsälälärenä bağışlana dielsä dä, bu säfärneñ çın maqsatı – säyäsät ide. Häm Medvedev monı üze dä yäşermäde:

"Bezneñ qısqa waqıtlı säfärneñ töp maqsatı, älbättä, Kosovonıñ qanunsız tanıluı şartlarında, Serbiägä teläktäşlek belderü. Bez Serbiäne bar cirlärenä wäkäläte bulğan däwlät dip sanıybız" dide Rusiäneñ älegä berençe vitse-premierı.

Medvedev şulay uq, Kosovonıñ 17 fevral konne beryaqlı bäysezlek iğlan itüe keşeçelek 100 yıldan artıq tözep kilgän xalıqara iminlek häm qanun sistemnarın cimerä dip östäde.

Quşma Ştatlar, Britaniä, Fransiä, Germaniä häm başqa Könbatış illäre Kosovonıñ bäysezlek iğlan itüen tanıdı.

Serbiäneñ tarafdarı bulğan Rusiä monı qanunsız ğämäl dip sanıy häm anı köçtän çığarırğa taläp itä.

Medvedevnıñ Belgrad säfäre, Kremlneñ bu mäsälädä säyäsäte saylawlardan soñ da üzgärmäyäçägenä işarä bulıp tora.

"Bu küpmeder däräcädä Rusiä säyäsäteneñ däwamlılığın kürsätü. Medvedev, Putin salğan suqmaqtan taypılmayaçağın, tışqı säyäsätneñ üzgärmiyäçägen kürsätä" di Mäskäwdäge Heritage Foundation üzäge başlığı Yevgeniy Volk.

Medvedevnıñ uzğan atnada Britan Şurasın Rusiädä küzläw belän şöğellänüdä ğayepläwen dä iskä alıp, Volk, ul Putinnıñ qırıs tışqı säyäsäten däwam itäçäk, dip farazlıy.

Berençe vitse-premier buludan tış, Medvedev däwlät qaramağındağı Gazprom monopoliäseneñ dä räise bulıp tora.

Uzğan ayda Mäskäw Belgrad belän energetika ölkäsendä berniçä kileşü tözegän ide. Bügenge säfär waqtında Medvedev tağın berne imzaladı – Könyaq Ağım ütkärgeçen suzu häm cir astı saqlanmaların tözü turında.

Serbiäneñ Könbatış qaraşlı yaña prezidentı Boris Tadiç xakimiätkä ilne Könbatışqa, Yewropa Berlegenä taba boru wäğdäläre belän kilgän ide.

Premier-ministr Voijslav Koştunitsağa yaqın millätçelär isä Rusiä qanatı astına kerüne alternativ itep kürä.

Kosovonıñ bäysezlege tiräsendäge wazğiät alarnıñ tegermänenä beraz su qoydı.

Bügenge kileşüdän soñ Koştunitsa, Serbiä belän Rusiä arasındağı xezmättäşlek barlıq däräcälärdä uñışlı bara, digän süzlär äytte.

XS
SM
MD
LG