Accessibility links

Кайнар хәбәр

İldä nilär bulıp yata? - 25.II.2008


►Qotırtuçı qunaq Qazannan quıldı ►Elemtä ministrı: İnternet öçen tüläwne kimetü kiräk ►Açıq mikrofon: 23 fivräldä sez närsä bäyräm ittegez?





►Qotırtuçı qunaq Qazannan quıldı

Älegä Rusiä vitse-premerı bulıp torğan Dmitriy Medvedevneñ zur ğına şaw-şulı tamaşa belän Qazanğa kilep kitüenä inde berniçä kön uzdı. Ämma bu könnärdä respublika başqalasında bulğan qayber säyäsi waqıyğalar äle haman da federal matbuğatta çağılış taba. Şundıy xäbärlärneñ berse 19 febräldä, Medvedev Qazanğa kilär aldınnan, başqalada qanunsız immigrasiagä qarşı xäräkät (DPNİ) başlığı Aleksandr Belovnıñ kilüe.

Qanunsız immigrasiagä qarşı xäräkät 2002 yılda oyışa. Xalıqqa ul ällä ni bilgele bulmasa da, Rusiä säyäsätçelärenä älege xäräkät, bigräk tä anıñ citäkçese Aleksandr Belov, ildä immgrantlarğa qarşı uzdırılğan törle uram cıyınnarın ütkärüe belän bilgele.

Şuña da küp kenä citäkçelär, säyäsätçelär, Belov bulğan cirdä härwaqıt nindi dä bulsa kötelmägän xäl kilep çığaçaq, di. Prezidentlıqqa nämzät Dmitriy Medvedevneñ Qazanğa kilüe aldınnan ğına, respublika başqalasına Aleksandr Belovnıñ da kilüen Tatarstan säyäsätçeläre näq menä şul säbäple baştan uq yaxşığa yuramadı.

----------------------------------------------------------------------------------------------

►Elemtä ministrı: İnternet öçen tüläwne kimetü kiräk

Tatarstanda İnternet Mäskäwdän un tapqır (!) qıymmäträk. Cirle prowayderlar da, İnternetnı Mäskäwdän kiterep satuçılar da monopolia tota. Axırğı çiktä bu iqtisadqa da zıyan sala.

Tatarstannıñ mäğlümatlaştıru häm elemtä ministrı Färit Fazılcanov: «İnternet öçen tüläw Tatarstanda bik qıymmät», di. Ministr fikerençä, qullanuçılar sanı näq şul säbäple tiz genä arta almıy.

“Bik qıymmät tora bezdä İnternet qullanu. Şulay uq İnternet çeltären kertü, aña totaşu da qıymmät. İnternet tarifları, äytik, sekundına 512 kilobit/sek tizlektäge limitsız tarif, Tatarstanda, Mäskäw belän çağıştırğanda, un tapqır diärlek qıymmäträk. Piterburdan da ike yarım çaması qıymmäträk. İdel buyındağı başqa töbäklärdän 1,4 tapqır çaması qıymmäträk.

Tatarstannıñ mäğlümatlaştıru häm elemtä ministrı Färit Fazılcanov, İnternetnı monda küpläp kitertüçelär sanı artsın häm alar arasında çın-çınlap köndäşlek bulsın öçen uñaylı eşmäkärlek şartların tudırabız, di.

Ministrlıq bu wäzğıyatne çişüdä däwlät şirkätlärennän bitär, xosusıy eşmäkärlekneñ täesirenä ömetlänä. Döres, Tatarstan xökümätenä bäyle häm üze dä monopoliadä ğäyeplänüçe “Tattelkom”ğa da bu nisbättän ciñel tügel ikän. Färit Fazılcanov süzlärenä qarağanda, “Tattelekom” Qazan kebek xalıq uqmaşıp yäşägän cirlärdä genä tügel, yıraq awıllarda da telefonlaştıru häm İnternetlaştıru belän şögellänä.

Sosial eş, yäğni xalıqqa yärdäm eşen başqara, di ul "Tattelekom" turında. Awıl digännän, alarğa kesä telefonnarı barıp citkän. Şul mobil elemtä aşa ministr käräzle operatorlarnı da 3G standartı nigezendä citez internet täqdim itärgä çaqıra.

----------------------------------------------------------------------------------------------

►Açıq mikrofon: 23 febräldä sez närsä bäyräm ittegez?

- İrlär bäyrämen bäyräm ittek. Watannı saqlawçılar könen.

- Bezgä ber il dä höcüm itmi. Berkemnän dä saqlanırğa kiräkmi.

- Bezneñ ğailädä xezmät itkän yegetlär yuq.

- Bu bezneñ bäyräm tügel, xärbilär bäyräme. Bezneñ ätilärneñ bäyräme.

- Mäktäptä bäyräm ittek. Şiğerlär söylädek ätilärgä. Piknik oyıştırdıq. İrlär köne bit. Miña odekolon büläk ittelär qızlar.

- Watanıbıznı saqlawçılar köne. Watanıbız Tatarstanda ike ulımnı üsterdem. Alar KÄİda xärbi kafedrada uqıdılar, xärbi rezervta toralar. Armia bit Rusiädä genä bar, Tatarstannıñ üz armiase yuq. Şulay bulğaç, böten xökümätneñ saqçıları bula. Watanıbız çaqırsa, baralar inde, biçaralar.

- Watanım Tatarstan minem.

- Televizordan äytmägännär ide bügen bäyräm dip, ällä berär bäyrämme bügen?

- 23 febrälne bez bäyräm itmibez. Kiäwem kitkän ide, elekke xärbi. İrem dä öydä yuq ide. Xezmät itüçelär genä bäyräm itälär bu könne.

- Bez studentlarğa bu bäyräm yuq. Bez uqıybız. Watannı saqlaw köne, bezneñ ilebezne yat keşelärdän saqlaw. İlebez Tatarstan, Rusiä dä inde ilebez. Bötenläy ber närsä dä belmim bu turıda.

- 23 febräl - sovet ğaskärläre bäyräme köne ide. Watanım minem... menä şul şul, watanıbız nindi qaldı xäzer iseme, Tatarstan dip äytergä beraz awırraq. Çönki möstäqıyllege bit anıñ xäzer şundıy ğına qaldı.

- Rusiä ... minem tuğan awılımnı beterdelär 1975yılda. Ul Udmurtiadä qaldı. Anda ike tatar awılı bar ide rayonda, alarnıñ ikesen dä beterdelär. Tatarlar bulsa da, mäktäpne yaptılar, balalar baqçasında xäzer udmurtça da, tatarça da söyläşergä yaramıy. Ber urıs balası bulmasa da, tik urısça ğına söyläşergä mömkin. Minem awılım xäzer yuq. Parca awılı dip atala ide. Bu bäyräm elek sovet ğaskärläreneñ, Qızıl armianeñ köne bäyräme itep sanala ide.

- Eştän bäyräm belän qotladılar.

- Bez ber urap qaytıyq äle dip kenä çıqqan idek uramğa.

- Däwlätne saqlaw bäyräme. Watan zur - böten Rusiä. 2 yıllap inde bu bäyrämne yal itep bäyräm itäbez. Öydä bäyräm ittek. Qunaqlar çaqırdıq.

- Bez bäyräm itmädek.Bezdä awıruçılar bik küp buldı.

бәйле язмалар

XS
SM
MD
LG