Türäneñ suräten türgä elü Üzäk Aziädä ğädäti küreneş. Häm citäkçe avtoritarraq bulğan sayın, anıñ surätläre dä kübräk.
Tik menä, Törkmanstannıñ elekke prezidentı Saparmurat Niyazov belän bu mäsälädä ber kem dä yarışa almıy. Törkmanbaşı üze isän çaqta uq, aña häm anıñ yaqın tuğannarına distälärçä altın häykälär, sınnar qoyıldı.
Şularnıñ iñ mäşhüre – Aşğabadnıñ iñ yuğarı urını – Neytralitet manarasına quyılğan. Bu häykäl kön äylänäse qoyaşqa iärep äylänep tora. Yarıy äle, kiresençä tügel.
Monnan tış Törkmanbaşınıñ suräte aqçalarğa, törle tawarlarğa suğılğan. Anıñ istälegenä "Särdär", yağni "böyek yulbaşçı" digän araqı çığarıla.
Zamanında Niyazov, ägär min ğadi keşe bulsam, häm minem prezidentım minem öçen min eşlägänne eşlägän bulsa, min anıñ surätlären bar cirläremä berketep betergän bulır idem, digän bulğan.
Kilgän xäbärlärgä qarağanda, Törkmanstanda Niyazov portretları alına başlağan.
"Niyazov portretları xäzer kürenmi. Min yörgän xastaxanädä elek bar diwarlar anıñ surätläre belän tulı ide. Barısın da alıp atqannar. Uramnarda häykäl, sınnarın äle kürep bula" di Aşğabadta yäşäwçe yazuçı Räxim Esenov.
Törkmän xökümätenä yaqın çığanaq radiobızğa äytüençä, xökümät oyışmalarına Niyazov portretların häm anıñ süzläre yazılğan taqtalarnı alırğa quşılğan. Bina tışında portretlar qalmasqa tieş. Bina eçendä genä Niyazov surätläre yaña prezidentnıqı belän alıştırılırğa mömkin. Bu kürsätmä Birdemöxämmädovnıñ üzennän kilä dielä.
Xäyer, şäxes şöhräte ezlären yuıp beterü öçen äle şaqtıy waqıt kiräk bulaçaq. Niyazov häm anıñ änise Qorbansoltan xanım häykällären Aşğabadta ğına tügel, ilneñ başqa töbäklärendä dä kürep bula.
Ul arada küzätüçelär ber şäxes şöhräte ikençese belän alışınmağayı, digän şöbhä belderä.
"Xäzer mädxiälär Birdemöxämmädov isemenä äytelä, näq Törkmanbaşına şikelle. İnşallah, ul monı tuqtatır, Niyazov däräcäsenä citmäs. Çönki xäzer Törkmänstan başqa illär belän mönäsäbätlär qora başlağanda, andıy axmaqlıqlar anıñ üzenä qomaçawlayaçaq" di sörgendäge oppozitsiä aktivistı Bäyräm Şixmuradov.
Kilgän xäbärlärgä qarağanda, küp kenä urınnarda Niyazov portretları Birdemöxämmädovnıqı belän alıştırıla ikän.
Lebap töbägendäge xäbärçebez äytüençä, uqu yılı başında andağı ber mäktäp direktorına Niyazov portretı urınına Birdemöxämmädovnıqın elergä quşılğan. Bu färman mäğärif idaräsennän kilgän.
Däwlät televideniese "böyek yulbaşçı" dip xäzer yaña prezidentnı atıy. Gäzitlär mädxiäne Birdemöxämmädov isemenä uqıy.