Accessibility links

җомга, 9 декабрь 2016, Казан вакыты 10:50

Rusiäneñ elekke tarixında da, sovet çorında da ike başlı xakimiätlär totrıqsızlıqqa kiterä ide. Medvedev-Putin idaräse belän närsä bulır?


2 martta prezident saylawdan soñ Rusiädä şaqtıy çeterekle wazğiät - ike citäkçe barlıqqa kiläçäk. Saylawda ciñer dip kötelgän Dmitriy Medvedev – prezident, ä xäzerge prezident Vladimir Putin – premier-ministr bulaçaq.

Rusiädä elek-elektän kilgän wağraq türälärneñ patşağa tuğrılıq kürsätü ğadätläre bar. Şularnıñ berse – eş bülmäsendä patşanıñ suräten diwarğa elep quyu.

Medvedev portretın elergä cıyınmıym

İke atna elek Kremldä uzğan matbuğat oçraşuında ber jurnalist Putinnan, Medvedev prezident bulğaç, sez anıñ portretın diwarğa elep quyasızmı, dip soradı.

"Kileşäsezder, min xökümät citäkçese bulsam, unikal wazğiät tuaçaq. Min üzem dä 8 yıl prezident bulıp eşlädem, häm naçar eşlämädem, - dip cawap birde Putin. - Dmitriy Anatolieviç prezident bulsa, miña anıñ belän mönäsäbätlär qoru öçen portret elü kiräk tügel. Eş mönäsäbätlären qoru öçen bezneñ başqa çaralar da citärlek."

İl belän kem idarä itäçäk?

Medvedevnıñ yaña prezident bulaçağına şik yuq. Putin bu oçraqta premier bulaçağın aldan äytep quydı.

Töp soraw şul: il belän kem idarä itäçäk? Häm bu ike başlı xakimiät totrıqlı bulırmı?

Küp kenä küzätüçelär, Putinnı prezident Medvedevqa buysınuçı premier itep küz aldına kitera almıy.

"Bu soñğı çığışı da urınınnan kitüçe prezident tügel, ä alğa taba da citäkçelek itäçäk keşe çığışı ide, - di oppozitsiädäge säyäsätçe Vladimir Rıjkov. - Yağni, kemneñ berençe, kemneñ ikençe ikänen xalıqqa gel añlatıp toralar."

Xakimiättä büleneş yaxşığa tügel

Läkin may ayında wazıyfasına kereşkännän soñ, Medvedev inde başqa wäkälätlärgä iä bulaçaq. Anıñ eş urını Kremldä, ul quät buınnarın kontrol itäçäk, "atom tarması" da anıñ qulında bulaçaq.

Rusiä tarixında yuğarı xakimiättäge büleneşlär ğädättä yaxşığa kitermi.

Gorbaçev belän Yeltsin perestroyka başında tarafdar bulsalar, soñnan köndäşkä äyländelär.

Yeltsin da 1991 yıl avgust fetnäsendä Rutskoy häm Xasbulatov belän iñgä-iñ tordı. 2 yıldan isä alar sıyınğan parlament binasın utqa tottı.

Quät buınnarında köndäşlek

Rusiäneñ quät buınnarında bügen dä köçle köndäşlek küzätelä. Ber yaqta narkotiklarğa qarşı köräş xezmäte başlığı Viktor Çerkesov. İkençe yaqta - FSB başlığı Nikolay Patruşev, prezident idaräse başlığı urınbasarı İgor Seçin. Seçinnıñ Medvedevqa qarşı buluı mäğlüm. Belgeçlär fikerençä, Putin şuşı siloviklar aşa Medvedevnı da kontrol itäçäk.

"Bu mänfäğät qarşılığı ğına tügel, ä Rusiäneñ kiläçägenä qaraşlar bäygese. – di Mäskäwdäge Carnegie üzäge belgeçe Andrey Ryabov. - Bu qarşılıq ozaqqa bara almıy. Yaqın arada kemder üzeneñ östenlegen kürsätergä tieş bulaçaq."

Putin Filaret bulmaqçımı?

Şulay da, Harvard professorı Edward Keenan süzlärençä, Rusiädä xakimiät büleneşe uñışlı bulğan çığarmalar da bar. Şularnıñ berse - XVII ğasır başındağı Mixail patşa häm anıñ atası partiarx Filaret çorı.

Romanov toqımınnan berençe patşa Mixail täxetkä utırğanda aña 16 yäş bula. İl belän anıñ atası Filaret idarä itä. Rusiädä "böyek fetnä" dip atalğan 15 yıllıq açlıq-yalanğaçlıq çorınnan soñ, alarnıñ idaräse şaqtıy uñışlı bula.

Professor Keenan fikerençä, Putinnıñ 90-nçı yıllarnı yış qına "böyek fetnä" çorı belän çağıştıruı, ä Medvedevnıñ Putinnı ata mäğnäsendä telgä aluı yuqqa tügel. Ğalim fikerençä, bu Filaretqa işarä, häm Putin monı belä torıp eşli.



XS
SM
MD
LG