Accessibility links

чәршәмбе, 7 декабрь 2016, Казан вакыты 11:50

► Rusiädä "däwlät qoruçı" yäki töp din qaysısı? ► AsılYar Eurovisiondä qatnaşmaqçı










► Däwlät qoruçı" yäki töp din qaysısı?


Tatarstanda pravoslav dineneñ Rusiädä zur urın totuın häm zur eş başqaruın tanıylar. Tik, Rusiä islam dinenä dä “tiyeşle xörmät” kürsätergä tiyeş, dilär.

Urıs pravoslav dinen yış qına Rusiädä töp, asıl din dip tanıtalar. Monı çirkäw üze alğa sörergä bik yarata.

Prezident saylawı aldınnan da bu mäsälä qabat-qabat kütärelep tordı. Xätta "üsterelde dä". Yekaterinbur häm Yuğarı Tura arxiepiskobı, urıs çirkäweneñ Uraldağı türäse Vikentiy atakay üz dinen inde “däwlät qoruçı” dip atadı.

Tatarstanda da urıs pravoslav dineneñ Rusiä tarixında möhim wazıyfa başqaruın tanıylar. Tik islam dine tarafdarları Rusiä prezidentı yäki däwläte islam dinenä dä “tiyeşle xörmät” kürsätergä tiyeş, di. Moñardan tış, Rusiädä pravoslavie bulğan kebek, Tatarstanda da töp din - islam dine, diyüçelär dä bar.

Tatarstan möftie urınbasarı Wäliulla Yağqub här ilneñ “üz töp dine” bar, di. “Britaniadä ul anglikan dine. İspaniadä katoliklıq. Törkiädä yäki Misırda islam dine. Ä Rusiädä bu pravoslav dine”, dip uylıy Wäliulla xäzrät.

Bu tarixtan şulay kilä, ämma “simvolik ber mäğnägä genä iä, çönki xoquqıy yaqtan bez dönyawi ildä yäşibez”, dip östi ul.

Islam dine turında yazuçı, “Watanım Tatarstan” gazetası xäbärçese Räşit Minhac dä monı tanıy.

“Elek-elektän urısnı dine tuplap tordı. Alarğa däwlät tä qorıp birde”, di ul. “Tik bügen inde Rusiädä möselmannar da yegerme million çaması. Ul ikençe töp din bula ala.”

Räşit Minhac uylawınça, ägär dä Rusiädä pravoslav dinenä genä östenlek birelä ikän, “Tatarstanda islam dinen töp, däwlätne qoruçı din dip atarğa kiräk”.

“Çönki Tatarstan avtonom respublikası qorılğanda, anı bu cirlärdä näk menä möselmannar toruın istä totıp qordılar”, di “Watanım Tatarstan”nan Räşit Minhac.

--------------------------------------------------------------------------------------------

► AsılYar Eurovisiondä qatnaşmaqçı

Tatar estradasınıñ yäş cırçısı AsılYar (Alsu Zäynetdinowa) Yewropağa omtıla. Döresräge, üze äytüençä, anıñ maqsatı - tatar cırın dönyağa işetterü.

3 mart könne ul Mäskäwgä kitte. 9 martta Rusiä başqalasında bıyılğı Eurovisiondä qatnaşırğa teläwçelär bäygegä çığaçaq. Anda AsılYar belän Dima Bilan, Aleksandr Panayotov, “Premer-ministr”, “Assorti” törkemnäre häm başqalar da qatnaşa. Ciñüçe isä, 24 mayda Belgradqa yul totaçaq. Bu qalağa dönyanıñ 43 ilendä ciñgän cırçılar kilergä tiyeş.

AsılYar bu bäygedä şiğeren Mönir Mazunov, köyen Marat Muxin icat itkän “Qarlığaçlar” cırın başqarırğa cıyına. Eurovisionğa anıñ turında mäğlümatnı äle yartı yıl elek kenä duslaşqan iptäş qızı Olya cibärgän. Ul anıñ belän bergä iñgliz telen öyränä.

“Räsemnärneñ häm yazmanıñ Rusiädäge bäygegä kitüe turında onıtqan da idek. Çaqıru kilgäç başıma, ciñsäm dä, ciñmäsäm dä tatar cırın başqalar da işetäçäk bit digän uy kilde”, di AsılYar.

9 martta 25 cırçı häm törkem qatnaşaçaq final bäygese “Räsäy” telekanalında turı efirda kürsäteläçäk.

AsılYar 2005 yılda İlham Şaqirov isemendäge Xalıqara tatar cırı bäygesendä ciñgän ide.



XS
SM
MD
LG