Accessibility links

чәршәмбе, 7 декабрь 2016, Казан вакыты 23:32

4 mart Ohayo häm Texas ştatlarında ütkän berençel saylawda ciñep, Hillary Clinton prezidentlıq köräşenä qayttı. Anıñ Barak Obama belän köräşe demokratlar qorıltayına qadär barır sıman. Respublikan namzät inde mäğlüm – John McCain.


"Xälitkeç sişämbe" dip atalğan bu saylawlar Hillary Clinton öçen çınlap ta xälitkeç ide. Moña qädär ul rättän 11 tawış birüdä ottırdı. Bu yulı da uñışqa ireşä almasa, küplär anıñ köräştän çigenäçägen farazladı.


Clinton: ciñüne sezgä bağışlıym


Ämmä Hillary xanım 4 ştatnıñ 3endä, şul isäptän, Ohayo häm Texas kebek ere ştatlarda ciñep, prezidentlıq köräşenä yaña can örde.

"Monda Ohayoda häm bar Amerika buylap – sızıp taşlasalar da, baş imägän, abınsa da, ayağına basqan, qul töşermi qatı eşlägän härkem öçen – bu ciñüne sezgä bağışlıym", - dide Hillary Clinton.

Ohayo belän Texasqa östäp Hillary xanım tağın Rhode İsland digän keçkenä ştatta ciñde.


Obama: ciñügä üz yulıbız belän barabız


Obama bu yulı ber Vermont ştatı belän çiklände. Bu näticäne aldan sizgändäy, ul tawış birü başlanu belän bolay digän ide:

"Bügen ni genä bulmasın, bezneñ delegatlar sanı yaqınça şul uq, bez ciñügä üz yulıbız belän barabız" dide Barak Obama.

Şulay itep, "xälitkeç sişämbe" demokratlarğa açıqlıq kitermäde. Clinton belän Obama arasında köräş däwam itä häm ul partiäneñ avgust axırında ütäçäk qorıltayına qadär barır sıman.

İkeseneñ dä delegatlar sanı ber çama bulsa, qaysısınıñ namzät bulasın qorıltayda partiä citäkçeläre, "super-delegat" dip atalğan berniçä yöz keşe xäl itergä mömkin.


McCain: citärlek tawış qazandıq

Ä menä respublikannarnıñ inde barısı da bilgele. Bar namzätlär arasında iñ qartı bulğan John McCain 4 ştatnıñ barısında da ciñep, üzeneñ respublikan namzät buluın rasladı.

"Duslar, bügen bez citärlek delegat tawışı qazandıq häm min zur ışanıç wä cawaplılıq xise belän Quşma Ştatlar prezidentlığına respublikan namzät bulaçağımnı iğlan itäm" dide John McCain.

Bu süzlär äytelgän arada, McCainnıñ soñğı köndäşe gubernator Mike Huckabee köräştän çigenüen iğlan itte.

Respublikan partiäse qorıltayı sentyabr başında ütä. McCainnıñ üz yağına fikerdäşlär tuplaw, "prezident qıyäfäten" ala toru öçen citärlek waqıtı bar.

Ä menä Clinton belän Obama, üz-ara köräşen däwam itkän sayın, kiresençä, "prezident qıyäfäten" yuğalta bara. Qayber belgeçlär fikerençä, bu 4 noyäbrdä ütäçäk saylawda demokrat namzätneñ ciñelüenä kiterergä mömkin.

XS
SM
MD
LG