Accessibility links

пәнҗешәмбе, 8 декабрь 2016, Казан вакыты 03:23

NATO illäre tışqı eşlär ministrları pänceşämbe Brusseldä alyansnı kiñäytü mäsäläsen tikşerde. Äğzalıqqa 3 Balkan ile – Xorvatiä, Albaniä, Makedoniä däğwa itä. Monnan tış tağın Ukraina häm Gruziä mäsäläse qarala.


Şuşı illärneñ qaysılarına çaqıru qäğäze bireläse aprel başında Buxarestta NATO illäre citäkçeläreneñ sammitında xäl iteläçäk. Sammitqa ber ay qala tışqı eşlär ministrları, Brusseldä cıyılıp, bulğan qarşılıqlarnı xäl itergä tırıştı.

3 Balkan ile arasınnan Xorvatiä iñ layıqlısı sanala. Albaniä belän Makedoniäneñ şansları azraq.

Makedoniäneñ NATOğa kerüenä Gretsiä qarşı çığa. İsem arqasında. Räsmi Afen belderüençä, Gretsiäneñ tönyaq töbäkläre dä Makedoniä dip atalu säbäple, kürşe ilneñ şul uq isem yörtüe anıñ ul cirlärgä däğwa itüenä işarä itä.
NATO illäre tışqı eşlär ministrları oçraşuı

Bügen Brusseldä Gretsiä tışqı eşlär ministrı Dora Bakoyanni Makedoniäneñ NATOğa kerüenä qarşılıq beldere.

Bu 3 Balkan ile xäzerge waqıtta NATOnıñ äzerlek programında qatnaşa.

İke elekke sovet ilen, Ukraina belän Gruziäne dä şuşı programğa kertü mäsäläse bügenge cıyınnıñ kön tärtibendä ide.

"Bez Ukraina häm Gruziä belän dä mönäsäbätlärne tikşeräbez. - dide NATO general sekretare Jaap de Hoop Scheffer. - İkese belän dä äwzem dialog bara. Bu bezgä mönäsäbätlärne tiränäytergä yärdäm itte. İlneñ ikese dä NATO yünäleşendä xäräkät itü telägen belderde".

Ukraina häm Gruziä belän mönäsäbätlär NATOnıñ üzendä dä küp sorawlar uyata. Bu täräqqiät Brussel belän Mäskäw aralarınıñ tağı da suınuına kiterä ala digän borçular bar.

Germaniä tışqı eşlär ministrı Frank-Walter Steinmeier, bügen Brusseldä, turısın äytäm, min moña bik şiklänep qarıym, dide.

Kosovonıñ bäysezlek iğlan itüe, Amerikanıñ Yewropada raketa qalqanı urnaştıru niäte arqasında Mäskäw belän Brussel araları bolay da kierenke ide.

NATOnıñ könçığışqa taba kiñäyüen Mäskäw üzenä yanaw dip qabul itä.

Quşma Ştatlar däwlät sekretare Condoleezza Rice, bezneñ säyäsät şul uq qala - äzerlege bulğan här ilgä NATO işekläre açıq, läkin ul illärgä äle ozın yul ütäse, dide.

XS
SM
MD
LG