Accessibility links

чәршәмбе, 7 декабрь 2016, Казан вакыты 15:36

►Ebru sänğate Tatarstanda ►Açıq mikrofon: Putin kitä, aña ni äyter idegez? ►Fonogrammağa xörmät kimi






►Ebru sänğate Tatarstanda


Revolusiagä qädär basılğan tatar kitapları tışlığına yış qına märmär stilendä töşerelgän räsemnärne kürep bula. Tik elek popular bulğan räsemnärne soñğı yıllarda Tatarstanda onıtıp beterä yazğannar ide. Menä bıyıl Qazanda bu ısulnı kire qaytaru mömkinlege tudı. Ğosmanlı patşalağında bulğan bu märmär ısulı belän yasaw sänğäte Törkiädä saqlanğan. Anı äbrü ısulı dip atıylar.

Miral Üzcan üze räsemnärennän kürgäzmä dä yasadı. Şulay uq berniçä kön däreslär biräçäk. Tik anı borçığan närsä bar: "Azatlıq" xäbärçesenä ul Qazan tamojnyasınnan zarların söyläde. Başqa illärgä ciñel genä kerep-çığıp yörgän rässamnıñ däres birä torğan qoralların Qazan aeroportında totqarlap qalğannar.

Kürgäzmädä Törkiädä yış bulğan keşelär küp ide. İstanbul hawa alanında alar barğanda da, qaytqanda da tamojnyanı kürmi dä qala. "Ä Qazannan kitkändä dä, kire qaytqanda tamojnya canğa tiä", dip zarlana xalıq. Bar keşegä dä kontrabandist, yä terrorçı tügelme bu dip qarıylar, dip tel şartlattı alar.

Çärşämbe könne uzğan kürgäzmä häm därestä Törkiäneñ Qazandağı baş konsulı Ahmet Ergin dä qatnaştı. Ul bıyıl Rusiädä uzaçaq Törkiä mädäniäte könnäre turında söyläde. “Öç şähärdä çaralar uza. Şularnıñ berse - Qazan”, - dide konsul.

“Xäzinä” kürgäzmä zalına “DA - Dialoğ Yevraziä” jurnalınıñ Tatarstandağı wäkile Räsim Xösnetdinov ta kilgän ide. “Rusiädä bu tör sänğät oçramıy. Ul borınğı törki ısul”, - di ul. Xösnetdinov ta ruxlanıp törek mädäniäte yılına äzerlänülären äytä. “Bu çara 8 äprel könendä Mäskäwdä açıla. Annarı Qazanda çaralar uzaçaq dilär. Bez dä ber çara yasarğa telibez”, - di Räsim Xösnetdinov.

--------------------------------------------------------------------------------------------

►Açıq mikrofon: Putin kitä, aña ni äyter idegez?

- Räxmät äyter idem. Tormışıbız naçar tügel bit inde, ber qarağanda. “Sälamätlek”, “Awıl xucalığı proektı, “Materinskiy kapital” kebek yaña proyektlar çıqtı ul prezident bulğanda.

- Yaxşı eşläde, küp eşläde keşelärgä.

- Yuq, äytäsem kilmi.

- Putin bik küp närsälär eşläde, xalıq öçen dä, Rusiä öçen dä. Kitmäsen ide vlasttan, üz statusın saqlasın ide. Tatarlar qaraşınnan qarağanda da, naçar dip äytä almıym.

- Anıñ vlasttan yıraq kitmäwen telim. Prezidentnıñ kiñäşçese buluın telim.Çönki anıñ Rusiäneñ üseşenä kertkän öleşe zur buldı. Aña sälamätlek häm ozın ğömer telim.

- Sawbullaşqanda min äyter idem, “Buldırasıñ!” dip. Andıylar kübräk bulsınnar ide äle bezneñ ildä.

- Närsä äytermen. Pensiä turındağı citeşsezleklär turında äyter idem. Medvedev Tübän Novgorodta äytte bit, pensiä 2009 yılda 5,500 sumğa kütäreläçäk, dip. Ä bäyälär kütärelü säbäple ul waqıtqa 10 meñ sum kiräk bulaçaq. Menä xäzer 300 sumğa kütärdelär fivral ayında, barasıñ aptikkä, anda daruğa bäyälär tağın artqan. Miña insult bulğannan soñ da, gruppa birmilär.

- Räxmät aña, eçke häm tışqı säyäsätne alıp barğan öçen iqtisad ölkäsendä totrıqlılıq öçen. Pensiäne, stipendialärne kütärgän öçen.

- Budjetta eşläwçelärgä xezmät xaqın az kütärdelär.

- Bitaraf.

- Putinğa, küp balalalı ğailälärgä däwlät yağınnan iğtibar kübräk bulsın dip äytik.

- Ul başladı bit säyäsäten. Anı däwam itüçe başqa däwamçısına ul möräcäğät itsen ide, küp balalalı ğailä däräcäsen kütärüne tuqtatmasqa.

--------------------------------------------------------------------------------------------

►Fonogrammağa xörmät kimi

Bügenge köndä estrada konserlarında cırçılarnıñ aldan yazılğan fonogrammalarğa iyärep cırlawı kiñ taralğan.


Zamanında Mäskäw merı Yüriy Lujkov üz qararı belän şähärdä ütüçe konsertlarda fonogramma qullanunı tıyğan ide. Ozaqlamıy Tatarstanda da artistlarnıñ fonoğrammağa cırlawına çik quyılırğa mömkin.

Premyer-ministr Röstäm Miñnexanov budjet aqçasına oyıştırılğan tamaşalarda cırçılarnıñ üz tawışı belän cırlawın şart itep, respublikanıñ mädäniät ministrlığına boyırıq birgän. Ä başqa konsertlar uzdırğanda afişada fonogramma bulu turında aldan kisätü urnaştırılırğa täqdim itelä.


Xökümät tarafınnan fonogrammağa cırlawnı tıyuğa, tamaşaçı da törle fikerdä. Kemder, küptän xıyallanğan telägebez çınğa aşa, alaysa aqça tüläp konsertta “awız qıymıldatuçılar”dan tämam tuyğan idek, di. Döres, andıy konsertlarğa yörüçelär üzläre ğäyeple diüçelär dä bar. Yänäse, cır tıñlarğa beräwne dä köçläp alıp kilmilär.

İkençe beräwlär, fonogrammalımı, ansızmı, min barıber ayırmıym, di. Kemneñder sanaqta çistartılğan yazma astına cırçılarnıñ awız açıp-yomıp toruı muzıka söyüçelärne räncetä. Şuña kürä xökümät kürsätmäsen alar tamaşaçı xoquqların yaqlaw bularaq qabul itä.

XS
SM
MD
LG