Yaña prezidentnıñ bäyäse törle cirdä törleçä. Urını häm sıyfatına qarap. Misal öçen, Mäskäwdäge İzmaylov parkı bazarında Medvedev matreşkaları 350 rubl tora.
Satuçı İrma xanım, küräseñ, Medvedevnıñ saylawda ciñäçägen aldan sizgän häm 20 matreşkanı ber atna aldan yasatıp quyğan. 2 mart könne alar inde satuda bulğan.
İrma xanım satqan matreşkalar 10 kisäktän tora, Medvedev, Putin, Yeltsinnan alıp, Petr I gä qädär. Citäkçelär berse eçenä berse salınğan.
Saylawnıñ ikençe könendä Çexiäneñ ber gäzite, Rusiä prezidentları waqlana bara, Yeltsin 180nän artıq ide, Putin - 165, Medvedev ni barı 160 sm, dip yazıp çıqtı.
İrma xanım satqan matreşkalarda kiresençä – Medvedev iñ zurısı, annarı Putin, Yeltsin, iñ axırda Petr I, tırnaq oçı qadäre genä.
Matreşkalardan tış İrma xanım tağın açqıçqa tağa, suıtqıçqa elä torğan äyberlär sata. Pasxa bäyrämenä Medvedev töşerelgän ağaç yomırqalar satmaqçı.
Medvedevnıñ citdiräk tarfadarları, älbättä, citdiräk närsälär ala ala. Misal öçen, 20 meñ rublgä Medvedevnıñ zatlı itep eşlängän ağaç ramda 1 metr zurlıqtağı portretın alıp bula.
Portretlar satuçı V Ramke internet säxifäse yazuınça, bu portretlar sezneñ bülmädä layıqlı bizäk bulıp toraçaq.
8 yıl prezidentlığı waqıtında Vladimir Putin üze tiräsendä, sovet çorındağıça, şäxes şöhräte tudıra aldı. Stalinğa sıman il buylap häykällär qoyılmasa da, Putinğa bağışlap cırlar yazıldı.
Medvedev ta şundıy uq şäxes şöhräte tudıra alırmı? Heritage Foundation üzägeneñ Mäskäw bülege citäkçese Yevgeniy Volk moña şik belderä.
"Medvedev prezident bulıp saylansa da, xakimiättä, iñ yuğarı urınnarda Putin quyğan keşelär utıra", - di Volk.
Moña qadär şäxes şöhräte citäkçeneñ üleme belän betä ide. Stalin, Xruçev, Brejnev belän şulay buldı. Putin isä xakimiättä qala, premier-ministr bulır dip kötelä. Şuña kürä, anıñ şäxes şöhräte dä qalaçaq, di Volk.
"Medvedevka üzen il başı itep tanıtır öçen waqıt kiräk, - di Volk. - Rusiädä prezident zur wäkälätkä iä. Medvedev bu wäkälätne niçek qullanırğa ikänen belä häm üz şöhräten buldırır, ul Putin külägäsendä qalırğa telämäs".
Cirle citäkçelär diwarlarına kemneñ portretın eler, digängä - bu bik awır soraw,- di Volk, - küräseñ, ikeseneken dä elergä turı kiläçäk.