Accessibility links

Кайнар хәбәр

İldä nilär bulıp yata? - 10.III.2008


►Eurovision'da tatar cırı yañğıramayaçaq ►Çit ilgä cäyge yal yullamaları kimendä 15% artaçaq ►Ufa gazetasına Qazan da bitaraf tügel





►Eurovision”da tatar cırı yañğıramayaçaq


Yäkşämbe kiçendä küp kenä Tatarstanlılar “Rusiä” qanalınnan küzen almadı.

Çönki monda tatar estradasınıñ yäş cırçısı AsılYar «Eurovision-2008» konkursında Rusiäne täqdim itüçene saylap alu bäygesendä qatnaştı. Ämma qızğanıç, bıyıl “Eurovision” konkursında tatar cırı yañğıramayaçaq. AsılYar ciñü yawlıy almadı.

Uzğan yılnıñ axırında Kamal teatrında “Go! Balamişkin” spektakleneñ premerası bulğan ide. Anıñ sujetı “Eurovision” konkursında tatar cırın qatnaştıruğa qorılğan ide. Alay ğına da tügel, spektakl axırında bez geroiniänıñ bäygedä tatar cırın başqaruına şahit buldıq. “Eurovision”nıñ üzendä ük bulmasa da, tatar cırçısı — AsılYar «Eurovision-2008» bäygesendä Rusiäne täqdim itüçene saylap alu çarasında qatnaştı.

Şulay itep, tatar cırların xalıqçan stildä başqaruçı AsılYar Europa konkursında qatnaşırğa mömkinlege buldı. Qızğanıç, bäygeneñ 50 yıllıq tarixında tatar cırı yañğaramayaçaq. Çönki bäygedä qatnaşqan 27 cırçı arasında aña iñ az tawış birelde. Ämma niçek kenä bulmasın, AsılYar “Räsäy” qanalınnan tatar cırın başqaruğa ireşte. Bu inde üze ber qazanış häm ğorurlıq. Monıñ belän ul tatar cırın Yewropa däräcäsenä tanıtuğa berençe adımın yasadı, di tatar cämäğätçelege.

Düşämbe könne AsılYar häm anıñ belän bergä çığış yasağan “Doroga iz goroda” biyü teatrı Qazanğa qayttı. Tele-ekrannarınnan kürengänçä, zalda Qazan tamaşaçıları da bar ide. Qazan mädäniät häm sänğät universitetında uquçı 15 student AsılYarğa teläktäşlek yözennän Mäskäwgä bardı. Alar zalda Tatarstan alämen häm “Bez buldırabız!” şiğärlären kütärep tordı.

“Eurovision” bäygesendä bıyıl Rusiäne menä inde ikençe tapqır Dima Bilan täqdim itäçäk. Monnan ike yıl elek ul bu bäygedä ikençe urınnı yawlağan ide, bıyıl tağın üz köçen sınap qaramaqçı ul. Cırçı 24 mayda Belgradqa yul totaçaq. Bu qalada dönyanıñ 43 ilennän kilgän cırçılar üzara köç sınaşaçaq.

--------------------------------------------------------------------------------------------

►Çit ilgä cäyge yal yullamaları kimendä 15% artaçaq

Rusiä turoperatorları Assosiasiase süzçese Svetlana Fedorova belderüençä, inflasia arqasında böten yünäleşlärgä dä yullamalarğa bäyälär yıl sayın 15-20 %qa üsep tora. Anıñ östenä cäyge yallarğa soraw zur bulğanğa turoperatorlar da kübräk aqça eşläw ömmätendä bäyälärne üz teläkläre belän östäp cibärä. Bu ölkä belgeçläre “dollarlı yallarğa” Misır, Tunis häm Taylandqa bäyälär başta martta, annan mayda häm cäy köne tağın ber tapqır artaçaq dip belderä.

“Ğädättägeçä 10-15 prosentqa artıp toralar bit alar”. Moña ber dä ğäcäplänergä kiräkmi dip belderä Qazandağı ber turistik şirkätneñ başlığı Nailä Wäliullina. Ämma soñğı wäzğeyätkä kilgändä isä ul: “Yağulıqnı aldan äytep bulmıy. Küzgä kürenep üsä bit”,- dip üzeneñ şöbhälänep quyuın da belderde. Bilgele bulğança diñgez buyı yalına oçu yullama bäyäseneñ yartısın täşkil itä. Annan da qala belgeçlär soñğı 10-15 yıl eçendä Rusiälelär üz itep yörgän Antalya tiräsendäge otellärgä bäyälär kisken kütärelü qurqınıçı yanıy dip belderä. Berençedän Ankara Yewropa berlegenä omtıla. İkençedän dollar töşä. Şuña kürä Törkiäneñ Urta diñgez yarı buylarına bäyälär “şalt” itep euroğa da küçep quyarğa mömkin. Sannar moña qädär dollarda niçek bulğan şulay qalırğa mömkin. San axırında euro östälü yullamanıñ 30 prosentqa artuına ğına kiteräçäk.

Rusiägä kilüçelärneñ sanı soñğı yıllarda kimügä taba bara.

Bik tizdän mart axırında Mäskäwdä ike zur kürgäzmä “İnturmarket” häm “MİT” uzaçaq. “Şunda küräçäkbez inde bäyälärneñ çit illärgä dä, Rusiäneñ üzendäge yallarğa da niçek artqanın”,- di turşirkät wäkilläre.

--------------------------------------------------------------------------------------------

►Ufa gazetasına Qazan da bitaraf tügel


“Watanım Tatarstan” häm “Qızlı tañ”nıñ tuqsan yıllığına iğtibar itelä. İldar Nizamov “Qızıl tañ”nıñ qäderle basma buluın assızıqlıy.

Bu könnärdä tatar matbuğatı ike waqıyğa, “Watanım Tatarstan” häm “Qızlı tañ”nıñ tuqsan yıllığına iğtibar itä. Qazanda çığuçı “Watanım Tatarstan” gazetasınıñ tuğan köne räsmi räweştä 12 martta bula. Bu uñaydan Qazanda nindider maxsus bäyräm tantanaları kötelmi. Anıñ qarawı Ufağa “Qızıl tañ”nıñ bäyrämenä bağışlap bu yazda fänni cıyılış uzaçaq. Qazannan da anda ğälimnär çaqırulı. Tatarstandağı matbuğat ta Ufa gazetasına bitaraf tügel. "Mädäni Comğa" da şul turıda yaza. Uzğan comğada “Watanım Tatarstan” da “Telebezneñ sizger saqçısı” isemle mäqälä bastırğan. Qazan däwlät universitetınıñ tatar jurnalistikası kafedrası professorı İldar Nizamov “Qızıl tañ”nıñ Başqortstan tatarı öçen genä tügel, bar tatar öçen dä qäderle basma buluın assızıqlıy.

İke tuğan - tuğandaş, Ufanıqı İnternetta

Landış Äbüdärova fikere İldar Nizamovnıqına awazdaş. Gazeta: “Başqortstannan “Qızıl tañ”, Tatarstannan “Watanım Tatarstan” gazetaların qardäş kenä tügel, igezäklär diyärgä bula. Alarnıñ näşer itelä başlawlarına 90 yıl!” şiğäre belän mäqälä birä. Anıñ autorı İldar Nizamov radiotıñlawçılarğa da Qazan belän Ufada çığıp kilüçe ike tatar gazetasınıñ tarixi häm maqsati urtaqlığın iskärtte.

“Ber-bersenä tuğan kebek gazetalar. İkese dä 1918 yılda, ictimağıy, milli ideanıñ yaña basqıçta küçkän waqıtında tuğannar. Üzara xezmättäşlek belän başqalarğa ürnäk bulıp eşlägännär”.

Bu gazeta “Başqortstan”, “Başqortstan xäbärläre”, “Yaña awıl”, “Kommuna” isemnäre belän çığıp kilä, 1944 yılnıñ 12 martınnan “Qızıl tañ” bularaq çığa .

Şul uq waqıtta "Qızıl tañ"nı internet säxifäsendä dä uqırğa bula. İldar Nizamov şul faktnı da telgä aldı. Anda kergän meñnärçä keşeneñ ber meñnän artığı tawış birüdä qatnaşqan. 1043-yı siräk uqıybız digän, ä 116-sı atnağa ber tapqır dip cawap birgän. Bu gazetanıñ ğömümi tirajı - 22500 dän artıq. Anı Tatarstanda da yazılıp uqıylar. Şulay uq “Yuldaş”, “İrek mäydanı” kebek gazetalar da anıñ mäqälälären üzendä küçerep bastıra.


XS
SM
MD
LG