Serbiäneñ bu xökümäte ozın ğömerle bulmas, dip aldan farazlanğan ide. Premier-ministr Vojislav Koştunitsa yaqlı millätçelär häm prezident Boris Tadiç yaqlı Könbatış tarafdarlarınnan tözelgän koalitsiä Kosovo dip atalğan berençe "çikläwektä" ük "teşen sındırdı".
Şimbä könne Koştunitsa ni barı 10 ay eşlägän xökümätneñ alğa taba eşli almayaçağın iğlan itte.
"Xökümätneñ Kosovo kebek möhim mäsälädä urtaq säyäsäte yuq, – dide Koştunitsa. - Urtaq säyäsäte bulmağan xökümät eşli almıy, bu anıñ axırı digän süz. 11 may cirle saylaw könne waqıtınnan alda parlament saylawın ütkärü iñ döres yul bulaçaq".
Tögälräk äytkändä, fiker qarşılığı Kosovonıñ bäysezlege mäsäläsendä tügel. Serbiäneñ töp firqaläre bu mäsälädä barısı da ber fikerdä – alar Kosovonıñ bäysezlegenä qarşı. Qarşılıq – Yewropa Berlege belän mönäsäbätlärne niçek qoru mäsäläsendä.
Koştunitsa yaqlı millätçelär Yewropa Berlege Kosovonı Serbiäneñ ber öleşe dip tanımıy torıp, anıñ belän eş itmäskä çaqıra.
Tadiç yaqlılar Yewropa Berlege belän tığız xezmättäşlek itergä, bu mäsäläne Kosovo mäsäläse belän butamasqa çaqıra.
May ayında ütäçäk waqıtınnan alda saylaw da Serbiäneñ şuşı ike yulnıñ bersen saylaw bulaçaq dip qarala.
Berlektä xäzerge waqıtta räislek itüçe Sloveniä tışqı eşlär ministrı Dimitriy Rupel, Serbiä Yewropa yulın saylar digän ömet belderde.
"Kiläse saylawda Yewropa köçläre ciñer dip ömetlänäbez. Moña işarälär bar. Fiker beleşülär, studentlar, zıyalılar, yäşlär demonstratsiäse. Döresen genä äytkändä, bezneñ serb duslarıbızğa Yewropa Berlegennän başqa yul da yuq. Alar qaya barsın soñ?" digän soraw quya Sloveniä ministrı.
Serbiä millätçeläreneñ bu sorawğa cawabı äzer – Rusiägä taba.
Ber ay elek ütkän prezident saylawda Radikal partiä citäkçese Tomislav Nikoliç Tadiçqa bik az ğına ottırdı. Ul saylaw da Serbiäneñ yulın bilgelär dip kötelgän ide.
Soñğı fiker beleşülärgä kürä, waqıtınnan alda parlament saylawı da bik kierenke bulaçaq. Küpçelekne radikallar da, Yewropa taraflılar da alırğa mömkin.
Dimäk Serbiädä bilgesezlek çorı dwam itä digän süz. Härxäldä 11 Mayğa qadär.