Accessibility links

шимбә, 10 декабрь 2016, Казан вакыты 08:21

BMOnıñ aşığıç yärdäm oyışmaları dönyada azıq-tölek bäyäläre artuğa borçılu belderde. Yuğarı bäyälär, beryaqtan, yärdäm itü mömkinlegen kimetä, ikençe yaqtan, millionlağan keşene açlıq xälenä kiterä.


Berläşkän Millätlärneñ Azıq-tölek programı dip atalğan yärdäm oyışması belderüençä, dönyada on, üsemlek mayı kebek könküreş tawar bäyäläre soñğı 9 ayda 40%-qa artqan.

Näticädä, açlarğa yärdäm itü belän şöğellängän bu oyışma üze dä awır xäldä qalğan.

Rimda urnaşqan bu oyışmanıñ büdjetında yärdäm eşlärenä bıyıl $2.9 milliard aqça qaralğan bulğan. Läkin, ul ğına citmi ikän, aşığıç räweştä tağın yartı milliard tabırğa kiräk, di oyışma wäkile Robin Lodge:

"Bulğan çığımnarnı qaplaw öçen genä, ä bez 78 ildä 73 million keşene aşatırğa tieş, menä şunıñ öçen genä dä bezgä tağın östämä yartı milliard dollar kiräk" di Robin Lodge.

Bu oyışma östämä aqçanı BMO çığımnarın qaplawçı xökümätlärdän alırğa cıyına.

Ul arada, dönyada millionlağan keşe, aşarına satıp alırğa aqçası citmäw säbäple, açlıq xälendä. Misal öçen, Äfğanstanda.

"Ğinwar axırında prezident Qarzai östämä 2.5 million keşegä yärdäm itü öçen $77 million soradı. Bu yağulıq bäyäläre artu näticäsendä genä barlıqqa kilgän, yaña açlar" di Robin Lodge.

Berençe qaraşqa, XXI ğasırda, açlıq turında söyläw, urınsız. Tabiği qazalar, qorılıq bulmasa, aşarğa citergä tieş, sıman.

Ğomümän alğanda, dönyada azıq-tölek çınlap ta citärlek. Bäyälär üsü säbäpläreneñ berse – bio-yağulıq sänäğäteneñ üseşe, azıq-tölek belän yağulıq arasında üzenä kürä yarış bara.

Tağın ber säbäp - täräqqiät itüçe illärdä taläp artu.

"Misal öçen, Hindstan, Qıtayda kübräk keşe it aşıy başladı. İt aşawçılar artqaç, mal aşatırğa da kübräk kiräk. Näticädä, keşegä digän aşlıqnıñ ber öleşe malğa kitä" di Robin Lodge.

Berläşkän Millätlär Oyışması bar dönya buylap xökümätlärne awıl xucalığına kübräk aqça birergä, yaña texnologiälär kertergä, öndäde.

Läkin, azıq-tölekkä taläplär artqan mäldä, anıñ bäyäse da arta ğına barır şikelle.


XS
SM
MD
LG