Qazan şähäre Möselman yäşläreneñ berençe spartakiadası bu şimbädä “Basket-xoll” zalında räsmi räweştä açıla. Spartakiadanı Qazan başqarma komitetınıñ fizik mädäniäte häm sport komitetı, “Añ”- “Soznanie” yäşlär oyışması oyıştıra. Yarışlar martta başlana, noyabrdä tämamlana. Mini-futbol, milli köräş, basketbol, ciñel atletika, voleybol, östäl tennisı, yözü yarışları ütä. İr-atlar häm xatın-qızlar ayırım yarışaçaq.
Qatnaşuçılar 16 häm 25 yäş aralığında. Alar sport forması häm ädäbendä dini qağıydälärne ütärgä, sport qağıydälären belergä, tabibtan röxsät alırğa, Spartakiada qağıydälären ütärgä tieş” . – di Radik Xösnetdinov.
Ä xanımnar bil alışa alamı?
Şimbä könne “Basket-xoll”da tantanalı töstä mädäni programma, köräşçelär turnirı belän açılır dip kötelä. Ä menä möselman xatın-qızları köräşe turında ni äytergä bula?
Spartakiadada qızlarnıñ da qatnaşuı fiker törlelegenä dä säbäp buldı. Möselman xatın-qızları yulbaşçısı, “Möslimä” oyışması räise Älmira Ädiätullina tatar qızları näfis bulğan sport törlärendä genä qatnaşsın ide di. Ayırım alğanda, ul saban tuy kebek bäyrämnärdä qızlar öçen köç qullanuçı sport törläre yarışın yasawğa qarşı çığa. Şul isäptän uzğan yılnı cırçı Salawat Fätxetdinov xätta xatın-qızlar arasında milli köräş yarışın da yasağan ide. Ä Älmirä Ädiatullina tatarça köräşne xatın-qızlar öçen “xäräm bulğan” sport töre dip atadı. “Xatın-qız tabiğäten kimsetep saban tuylarında ger kütärtterälär, qul köräşterälär. Ä inde köräştä dä xanımnarnı qullanu ber aqılğa da sıymıy”, - di ul. Ädiätullina qızlar öçen yögerü, ciñel gimnastika kebek “sälamätlekkä faydalı häm näfis” sport törlären täqdim itä.
Radik Xösnetdinov bu nisbättän: "Älmirä apa bik döres söyli. Bez äxlaq qağıydäläre buyınça ğına yarışlar yasıybız. Basseynda yözü yarışı waqıtında da tamaşaçılar kertelmi. Qızlar köç qullanu kiräk bulğan sport yarışlarında da qatnaşmıy", - di.