Accessibility links

чәршәмбе, 7 декабрь 2016, Казан вакыты 13:32

Мәскәүдә урыс телендә Коръәни Кәримнең яңа тәрҗемәсе басылып чыкты. Бу изге китапның урыс телендәге 22нче тәрҗемәсе.


17 мартта Җурналистларның үзәк йортында «Граҗданин» дип аталган халыкара Клуб ул басманы тәкъдим итү чарасын уздырды. Бу чарада Коръәни Кәримнең яңа тәрҗемәсен эшләүчеләр – бүгенге көндә Лондонда яшәп иҗат итүче язучы Равил Бохараев, Мәскәүдән Рөстәм Хамматвәлиев һәм пакыстанлы Халид Әхмәт тә катнашты. Бу тәрҗемә изге китапның урыс теленә нәшер ителгән 22 тәрҗемәсе, диделәр алар.
Равил Бохараев үзенең чыгышында, бу изге китап тәкъдим ителгән көнне бик мөһим көн, дип атады. Һәм ул, нинди генә китап булмасын, яңа китап турында сөйләшү ул вакыйгага тиң нәрсә, ә менә бөтен дөньяда яңа бер цивилизация тудырган китап ул бер генә: ул - Коръәни Кәрим, диде.

Тәкъдим итү чарасына халык бик күп җыелган иде. Алар арасында мөселманнар гына түгел, башка диннәргә караган кешеләр дә күп булды. Иң башта Коръәни Кәримнең яңгырашы белән таныштырыр өчен, Хәлид Әхмәт Коръәни Кәримнән гарәпчә аятләр укып ишеттерде, ә инде Равил Бохараев аның тәрҗемәсен аңлаты.

Элекке тәрҗемәләрдә аңлауга кыен булган урыннар күп. Шуңа күрә без бу тәрҗемәне аңларга җиңелрәк булыр өчен ясадык, диде ул. Ләкин никадәр генә тәрҗемә булмасын Коръәни Кәримнең тирәнлеген аңлатып бетергә мөмкин түгел, диде Равил Бохараев.

Коръәни Кәрим ул могҗиза. Ул рәхимлек, мәрхәмәтлек. яктылык могҗизасы, диде ул. Шул ук вакытта Бохараев, тәрҗемә никадәр генә мөкәммәл булмасын, ул барыбер келәмнең тискәре ягы кебек. Анда кытыршылыклар булырга мөмкин. Без тәрҗемә вакытында барлык тәрҗемәләрне җыеп, үзебезнең тәрҗемәләрне шуларга карап та чагыштырдык, диде. Урыс телендә Коръәни Кәримнең 22 тәрҗемәсе булгач, тагын бер мәртәбә тәрҗемә ясау нигә кирәк булды, дигән сорауга Равил Бохараев: “Булсын. Йөз мәртәбә булсын. Бу китапның мәгънәсен башка телләргә аңлатып бетерүе авыр”, диде.
Шунысын да әйтергә кирәк, Коръәни Кәримнең бу тәрҗемәсе исламның «Әхмәди» тармагы тәкъдиме белән ясалган. Русиянең Европа өлеше мөселман Дини идарәсе дә, башка күп кенә төбәкләрдә дә хәзерге вакытта Лондонда урнашып калган «Әхмәди» ислам дини оешмасын кабул итмиләр. Чөнки «әхмәдиләр» Мөхәммәт пәйгамбәрдән соң да тагын бер пәйгамбәр булган дигән тәгълимәтне алга сөрә. Сезнең бу тәрҗемәгә дини идарә ничек карады, дигән сорауга Равил Бохараев: «Без дини идарәгә дә чакыру бирдек. Мөселман җурналистлары оешмасыннан Радик Басыйров кына катнашты. Халык тәрҗемәне укысын әле, алар нәрсә әйтер», диде.

Сезнең Русиягә кайтуыгыз бу чара өчен генә түгелдер, тагын нинди планнарыгыз бар дигәнгә, Тукай бүләге лауреаты, танылган язучы Равил Бухараев: “ 21 мартта Казанның «Әкият» курчак театрында минем әсәр буенча эшләнгән спектакль премьерасы булырга тиеш, шуңа дип тә кайттым”, диде.
Шулай итеп, Мәскәүдә Коръәни Кәримнең өр-яңа урыс теленә булган тәрҗемәсен тәкъдим итү булды. Ул тәрҗемәне ун ел дәвамында «Әхмәди» дини оешмасы җитәкчелегендә пакыстанлы Хәлид Әхмәт һәм язучы Равил Бохараев, Мәскәү егете Рөстәм Хамматвәлиев эшләгән.

XS
SM
MD
LG