Bu uñaydan Amerika Quşma Ştatları prezidentı George Bush radiobıznıñ İran bülege xäbärçese belän oçraşıp, tıñlawçılarnı yaña yıl belän qotlap, Amerika ğömer buyı İran xalqınıñ ireklekkä omtıluın yaqlap yäşäde, ämma berük waqıtta Quşma Ştatlar Tährannıñ atom qoralına iä nulu telägen berqayçan da xuplamayaçaq, dip belderde.
Prezident Bushnıñ Näwrüz könendä dä kübräk İran turında söyläwe ber dä ğäcäp tügel - Näwrüzne bäyräm itü üze asılda näq menä borınğı İran-farsi mädäniätenä barıp totaşa. Üzäk Aziä häm İdel-Ural möselmannarına da bu bäyräm Şäreqneñ şuşı öleşennän kilä.
Şuña da George Bushnıñ yaña yıl belän qotlawı asılda Amerikanıñ İran mädäniäten tanuı, xörmät itüe turında söyläwgä totaşıp kitte:
"Amerika Quşma Ştatları härkemgä dä bäxetle yaña yıl teli! Amerikan xalqı İrannıñ böyek tarixın häm mädäniäten xörmät itä, bezneñ bu xalıqqa ixtiramıbız zur, bezneñ fäqät İrannıñ xökümäte belän genä problemnarıbız bar. Çönki ul xökümät yanawlar yasap tora häm İran xalqın dönyadan ayıruğa yünälderelgän qararlar qabul itä", di prezident Bush.
Şuña da Quşma Ştatlarnıñ iñ yuğarı citäkçese bäyräm könendä İrandağı keşelärgä turıdan-turı çığunı xup kürä, bigräk tä yäşlärgä häm xatın-qızlarğa möräcäğät itä:
"Minem yäşlärgä äytäse kilgänem şul - sezneñ cämğiät tä qayçan da bulsa irekle bulaçaq. Ä inde xanımnarğa şunı äytäsem kilä - Amerika xatın-qızları sezneñ üz balalarığıznı ömetle ber cämğiättä üsterergä häm alarnıñ tınıçlıqta yäşäwe telägen urtaqlaşa", dip belderä Bush.
Amerikan prezidentı şulay uq üzeneñ İrannı kiläçäktä süz irege bulğan häm bar dinnärgä dä irekle üseş tä'min itelgän ber il itep kürergä teläwen äytte. Bu eştä İran xalqında Quşma Ştatlar yağınnan härzaman yaqlaw tabaçağına şik bulmasın, dip ışandırdı ul:
"İrandağı xakimiät häm cämğiätneñ äle barası yulı şaqtıy ozın, ämma İran xalqı şunı belep torsın - alarnıñ irekle cämğiättä yäşäw telägen Quşma Ştatlar minem prezidentlıqta da, kiläsesendä dä nıqlap yaqlayaçaq", di George Bush.
Radiobız xäbärçese belän ütkärgän äñgämäsendä Quşma Ştatlar prezidentı şulay uq üz ile belän İran arasında yaqınayu bula aluına işarä itte, ämma monıñ öçen Tährandağı xökümät xäzergegä qarağanda başqa törleräk qararlar qabul itärgä tieş dip belderde.
Şularnıñ berse - İrannıñ üzendä uran bayıtu eşlären tuqtatuı. Prezident Bush, "İran xalqı şunı añlarğa tieş - Quşma Ştatlar İrannıñ üz atom qoralın buldıru tırışlığına qarşı buluın däwam itäçäk", dide, gärçä berük waqıtta ul, bez atomnı tınıç maqsatlarda qullanuğa uñay da qarıy alır idek digän işarä dä yasadı.
"Tik problema şunda ki - İran xökümäte elek xaqiqätne yäşerep, yalğan söyläp kilde, şuña da xäzer Quşma Ştatlar öçen dä, qalğan dönya öçen dä alarğa ışanu bik awır", dide Näwrüz uñayınnan radiobıznıñ İran bülege xäbärçese belän äñgämäsendä amerikan prezidentı George Bush.