Accessibility links

якшәмбе, 11 декабрь 2016, Казан вакыты 13:14

Qıtay räsmiläre Tibetta bulğan çualışlar näticäsendä qorbannar sanı xäzer 19 dip belderde. Elegräk 13 digän ide. Sörgendäge tibetlılar isä ülüçelär 100 çaması di. Çualışlarnı oyıştıruda şiklänelgän 21 keşeneñ suräte internetta urnaştırılğan. Alarnı tabırğa yärdäm itüçelärgä aqçalata büläk wäğdä itelä

Räsmi basmalar ike şiklänelüçe inde qulğa alınğan dip xäbär itä.

1950-nçe yıllarda kommunistik köçlär kilgänçe Tibet bäysez töbäk ide. Qıtay kommunistları mönbäre sanalğan "Xalıq gäzite" bügenge aldınğı mäqaläsendä Tibetta bäysezlek taraflı köçlärne izergä çaqıra. Şunda uq Quşma Ştarlar, Yewropa häm Aziä citäkçeläreneñ söyläşülär ütkärü täqdime kire qağılğan.
Sincan çualış töbägenä terälep tora

Räsmi mäğlümat çaraları tönyaq-könbatıştağı Sincan töbägendä yäşäwçe uyğırlarnı Tibettağı baş kütärügä iärmäskä kisätä.

Tibet başqalası Lhasada çualışlar 10 martta başlandı häm soñnan tibetlılar yäşägän kürşe Gansu, Sıçuan, Qinğay vilayätlärenä cäyelde.

Räsmilär töbäkkä östämä ğaskär kiterde. Çit il keşeläre anda kertelmi.

Räsmi Pekin Tibetnıñ ruxi citäkçese, sörgendä yäşäwçe Dalay-lamanı şuşı çualışlar artında toruda, Olimpiä uyınnarına ayaq çalu niyätendä ğayepli.

Dalay-lama bu ğayepläwlärne kire qaqtı, köç qullanulı qarşılıq çaraların tänqitkä tarttı, Pekinğa barıp Qıtay räsmiläre belän oçraşırğa äzerlegen belderde. Ul watanına kiñräk möstäqillektän artıq başqa närsä telämäwen dä äytte.

Yewropa parlamentı prezidentı Hans-Gert Poettering, Qıtay räsmiläre Dalay-lama belän söyläşergä telämäsä, Olimpiyä uyınnarına boykot belderü döres adım bulır dip belderde.

Germaniäneñ Bild am Sontag gäzitendä yäkşämbedä basılaçaq äñgämäsendä ul Yewropa Berlegen Tibet xalqın yalğız qaldırmasqa, andağı xoquq bozular turında "ber tawıştan" söylärgä çaqıra.

Amerika kongressınıñ wäkillär pulatı räise Nansy Pelosi comğa könne Hindstanda Dalay-lama belän oçraşqannan soñ, dönya cämäğatçelegen Qıtaynıñ Tibet säyäsätenä tänqit belderergä çaqırdı.

XS
SM
MD
LG