Accessibility links

якшәмбе, 11 декабрь 2016, Казан вакыты 05:14

NATOnıñ ähämiätle sammitı aldınnan Rusiä Gruziägä qarata qarşılıqlı adımnar yasıy. Beryaqtan, 18 ay elek Tiflisqa kertelgän çikläwlärne yomşarta. İkençe yaqtan, Gruziäneñ alyansqa quşılu ixtimalı uñayınnan yanawlı belderülär yasıy.


Sişämbedä Britaniäneñ Financial Times gäzitenä birgän äñgämäsendä Rusiäneñ saylanğan prezidentı Dmitriy Medvedev, Gruziä häm Ukrainanıñ NATOğa quşıluı Yewropanıñ iminlegenä yaxşığa bulmayaçaq, dip belderde.

"Tiflis häm Kievnıñ NATOğa yaqınayuwı bezne şatlandırmıy. Üze qatnaşmağan xärbi bloknıñ çik buyına yaqınayuwı ber däwlätne dä şatlandıra almıy, dide ul.

İkençe yaqtan Rusiä şul uq könne Gruziä belän hawa bäyläneşen yañarttı. Oçqıçlar 2006 yılnıñ oktäbrendä Gruzuiägä kertelgän iqtisadi çikläwlär qısalarında tuqtatılğan ide.

Gruziäneñ Strategik häm xalıqara tikşerenülär fondı belgeçe Arçil Gegeşidze monı, Mäskäwneñ küptän sınalağan "yanaw häm maylaw" säyäsäte dip atıy:

"Beryaqtan qırıslıq, ikençe yaqtan, çikläwlärne yomşartu – yaxşı mäğlüm qamçı-qalca säyäsäte. – di Gegeşidze. - Monıñ aşa Rusiä Gruziägä yoğıntı yasarğa, Gruziäne üzenä bäyle itergä tırışa."

Kiläse atnada Buxarestta ütäçäk sammitta Gruziä häm Ukrainanıñ NATOnıñ Äğzalıq planına quşılu mäsäläse qaralır dip kötelä. Bu plan äzğalıq yulında möhim adım sanala.

Quşma Ştatlar bu ike ilneñ alyansqa quşıluın xuplıy. Germaniä häm Fransiä kebek başqa illär älegä şik belderä.

Mäskäwneñ bu mäsälägä tiskäre qaraşı uzğan atnada da yañğıradı. Comğa könne Rusiä duması, Gruziä NATOğa quşılsa, Abxaziä belän Könyaq Osetiäne tanırğa çaqırğan qarar qabul itte.

Gegeşidze monı Gruziäne NATOğa kertmäs öçen, Könbatışnı örketü tırışlığı dip bäyäli.

"Rusiä kinayäle räweştä Gruziägä qarşı säyäsät alıp bara. – di Gegeşidze. - Gruziäne NATOğa yaqınaytmas öçen törle yanawlar yasıy, Könbatışnı örketä."

Mäskäwneñ Gruziägä iqtisadi çikläwläre – Tiflis Rusiä xärbilären küzläwdä ğayepläp ildän quğannan soñ kertelgän ide. Ämmä küzätüçelär fikerençä, bu nizağnıñ tamırları küpkä tiränräk. Alar Gruziäneñ Rusiä qanatı astınnan çığıp, Könbatışqa yaqınayu tırışlıqlarına bäyle.
XS
SM
MD
LG