Accessibility links

дүшәмбе, 5 декабрь 2016, Казан вакыты 03:29

Ğiraq suğışçılar Moqtada äs-Sadr üz köçlärenä xökümätkä qarşı köç qullanunı tuqtatırğa çaqırdı. Monıñ öçen premyer-ministrğa taläplär quyıldı.


Şığı suğışçılar yulbaşçısı xökümätneñ Basra häm Bağdad şähärlärendä ğadättän tış xälne beterüne häm bäreleşlärdä qatnaşqannarnı yarlıqawnı taläp itä.

Bağdadta ğadättän tış xäl 27 mart atna kiç könne kertelde. İnde öçençe kön bu tärtip şähärdä maşinalar häm cäyäw yörüçelärneñ xäräkäten çikli.

Barısı da sişämbe könne premyer-ministr Nuri äl-Mälikineñ könyaqtağı Basra şähärendä şığı suğışçılarınıñ Mähdi köçlärenä qarşı xärbi çara iğlan itüennän başlanıp kitte.

Basrada Ğiraq iminlek köçlärenä yardämgä Britan oçqıçları kilde, suğışçılar cıyılğan dip şiklänelgän cirlär utqa totıldı.

Hälak bulğannarnıñ tögäl sanın belü mömkin tügel. Räsmi sannar 120 suğışçı üterelde disä, cirle mäğlümat çaraları ülgännärneñ sanı 290ğa citte, dip xäbär itte.

Köç qullanu könyaqqa taba Qut, Nasiriä, Qarbala häm Hilla şähärlärenä dä taraldı.

Bağdadnıñ sälämätlek saqlaw departamentı başlığı Ali Bustan süzlärenä qarağanda, sişämbedän birle başqala xastaxanälärenä 130lap mäyet kiterelgän.

Sadr xäräkäte wäkile Fatah äş-Şäix Ğiraq xökümäte häm AQŞ ğaskärläre şimbä kiç Bağdadtan könçığışqa taba urnaşqan Sadr bistäsendä tınıç xalıq yäşägän cirlärne uta tottı, Mälikineñ ğamälläre "isteriäne" xäterlätä, dip belderde.

Ğiraq premyer-ministrı suğışçılarğa qoralların salırğa başta öç kön birgän bulsa, xäzer bu waqıtnı 8 aprilgä qadär ozayttı häm qoralların kiterüçelärgä aqça wäğdä itte. Şulay uq ul xökümät köçläreneñ Basradan suğışçılarnı "yuq itmiçä" kitmiäçäklären belderde häm alarnı "äl-Qaidadan da yamanraq" dip atadı.

"Bez äl-Qaida turında söylärgä künekntek inde. Qızğanıçqa qarşı arabızda äl-Qaidadan da yamanraqlar bar. Äl-Qaida ber ğayepsez keşelärne üterä, binalarnı cimerä, boları da näq şunı uq qıla. Äl-Qaida säyäsi sistemanı cimerergä teli, bolarnıñ teläge dä näq şul," - dide Mäliki.

Sadr köçläre elek AQŞ yaqlı Ğiraq xökümätenä qarşı bulsa da, Mälikineñ koalisiäsen yaqlap kilä ide.

2007 avgustında kertelgän häm 2008 fivralendä yañartılğan köç qullanunı tuqtatu kileşüe mäsxäbara bäreleşlärne küpkä kimetkän ide.
Üktäberdä Ğiraq vilayätlärendä saylawlar ütäçäk. Köç qullanu da şığıylarnıñ törle törkemnäreneñ üzara xakimiät büleşüenä bäyle, dip farazlana.
XS
SM
MD
LG