Accessibility links

шимбә, 3 декабрь 2016, Казан вакыты 18:41

Çärşämbedä Buxarestta NATO sammitı açılır aldınnan amerikan prezidentı George Bush, tağın ber tapqır, Ukraina belän Gruziägä Äğzalıq planın birergä çaqırdı. Räsmi Mäskäw bu ğamälgä qarşılığın belderde.


Çärşämbedä NATO sammitı başlanır aldınnan amerikan häm Rusiä räsmiläre, tağın ber tapqır, Ukraina belän Gruziäneñ NATOğa quşılu mäsäläsenä qarata üzläreneñ qapma-qarşı qaraşların yañğırattı.

Amerikan prezidentı Georeg Buş, Romania başqalasına kilgäç, ber kön elek Kievta äytkän fikeren qabatladı.

"Bez Buxarestta Gruziä belän Ukrainanıñ NATOğa kerü omtılışın xuplarğa, alarğa bu maqsatqa ireşü öçen yul kürsätergä tieş. Minem ilneñ qaraşı açıq, - dide Buş. - NATO Gruziä belän Ukrainağa Äğzalıq planın birergä tieş".

Kiev belän Tiflis sorağan Äğazlıq planı NATOğa kerü yulında berençe adım sanala. Rusiäneñ qarşı çığuına qaramastan, Buş Ukraina belän Gruziägä bu forsatnı birergä çaqırdı.

Rusiä tışqı eşlär minsitrı Sergei Lavrov Buşqa Mäskwädän, Däwlät duması mönbärennän cawap qaytardı.

"Bu cawapsız qalmayaçaq, min sezgä wäğdä itäm. Läkin bez üpkäçe malaylar tügel, bezneñ cawap pragmatik bulaçaq. –dide Lavrov. - Bez üzebezneñ iqtisadi, saqlanu quätebezne köçäytäçäkbez. Bez här törle täräqqıyätkä äzer".

NATOnıñ üzendä bu mäsälädä fiker qarşılığı saqlana. Äytik, Germaniä belän Fransiä, bu ike il älegä äzer tügel dip, alarğa Äğzalıq planın birügä qarşı çığa. Misal itep, Gruziädäge separatist töbäklär, Ukrainadağı xalıq fikere häm Rusiäneñ qarşı çığuı kiterelä.

"Nindi genä qarar qabul itelsä dä, ul uñay häm tögäl bulaçaq, - dide çärşämbedä NATO başlığı Jaap de Hoop Scheffer. – İke ilgä dä alyansta urın bar. Bezneñ işeklär açıq. Ägär alar tieşle şartlarğa cawap birsä, teläsälär, berär könne ul işektän uza alaçaq."

Ukraina belän Gruziä mäsäläsennän tış sammitta Äfğanstan mäsäläse dä tikşereläçäk. Buş bügenge çığışında tağın ber tapqır NATO äğzaların anda östämä ğaskär cibärergä çaqırdı.

Monnan tış Buş Yewropada raketa qalqanın urnaştıru niäten dä telgä aldı. Bu mäsälädä ul Rusiä prezidentı Putinnı tağın ber tapqır künderep qararğa tırışaçaq, dip kötelä.

Sammittan soñ, Buşnıñ Xorvatiä, annarı Rusiägä baruı qaralğan. Putin belän ul anıñ Soçi utırmasında oçraşa.

XS
SM
MD
LG