Accessibility links

җомга, 9 декабрь 2016, Казан вакыты 09:02

NATO Rusiäne tınıçlandıra, Rusiä ışanmıy


NATOnıñ Buxarestağı olı cıyınında ikençe kön Rusiä häm Ukraina citäkçeläre belän söyläşülärgä bağışlandı. İğtibar bigräk tä Rusiäneñ urınınnan inde kitärgä cıyınğan prezidentı Putingä yünälgän ide.

Häm Rusiä prezidentı üzenä bağlanğan ömetlärne aqladı diärgä bula - bu yulı da ul Rusiäneñ NATO, häm ğomumän, bar Könbatış belän araları turında üzenä xas qırıslıq belän qızıqlı ğına belderülär yasadı.

Putinneñ Rusiä çiklärennän tışta doşman kürü ğädäte yaña närsä tügel, ul monı prezidentlığı çorında härdaim kürsätep kilde. Üz qurquların ul Buxarestta da yäşermäde häm NATOnıñ könçığışqa taba kiñäyüe xaqında bolay dide:

"Bezneñ çik buylarında, üz ğämällären Washington kileşüendäge 5nçe matdä nigezendä dä qoraçaq küätle ber xärbi berläşmä barlıqqa kilüe Rusiädä ilneñ iminlegenä turıdan-turı yanağan ber qurqınıç bularaq qabul iteläçäk. Bez bu eşlärneñ Rusiägä qarşı yünälderelmäwe turındağı belderülär belän genä qänäğät bula almıybız", di Vladimir Putin NATO kiñäyüen haman da zur yanaw bularaq bäyäläwen raslap.

Putin telgä alğan Washington kileşüeneñ 5nçe matdäsendä, NATOdağı ber äğza ilgä qarşı yasalğan höcümneñ bar saqlanu berlegenä yasalğan dip bäyälänäçäge turında äytelä. 1949nçı yılda imzalanğan şuşı dolkument NATOğa nigez salğan kileşü bulıp tora.

Yäğni NATO üzenä Ukraina häm Gruziäne dä alğan oçraqta, häm şuşı ike il belän Rusiä arasında berär qorallı nizaq çığa qalsa, bu Rusiäneñ turıdan-turı bar NATO qüäte belän eş itäçägen añlataçaq digän süz.

Mäskäwneñ andıy ixtimaldan qurquın añlap bulsa da, uyğa, dimäk Rusiä Ukraina yä Gruziä belän mömkin problemaların qoral qullanıp xäl itü xaqında uylana digän fiker dä kilä.

Şunıñ sürätendä Kiev häm Tiflisneñ ni öçen NATOğa şul qädär omtıluı añlaşıla töşä.

Ukraina da, Gruziä dä asılda Buxarest oçraşuında NATOnıñ Äğzalıqqa ireşü planın aluğa ömetlängän ide. Ämma bu älegä bulmıy qaldı - NATOnıñ qayber äğzaları, cömlädän Fransiä häm Germaniä, alar äle tulı äğzalıqqa äzer tügel dip, Ukraina häm Gruziägä andıy plan täqdim itügä qarşı çıqtı.

Läkin ikençe yaqtan Kiev tä, Tiflis tä kiläçäktä bu bik mömkin eş digän nıqlı garantiälär aldı. NATOnıñ baş sekretare Jaap de Hoop Scheffer monı pänceşämbe dä äytte, comğa könne Ukraina prezidentı Viktor Yuçenko belän oçraşqanda da qabatladı. Tieşle reformalar ütkärü häm äğza bulu eşendä NATO Ukrainağa härtörle yardäm kürsätäçäk, dide baş sekretar de Hoop Scheffer.

Şuşı ike ilneñ NATOğa kerügä äzerlegen xäzer dikäberdä uzaçaq oçraşularında NATO däwlätläreneñ tışqı eşlär ministrları tikşeräçäk. Ukraina prezidentı Yuçenko üz ilenä Äğzalıqqa ireşü planı näq şunda bireler dip ömetlänä.
XS
SM
MD
LG