Accessibility links

Кайнар хәбәр

İldä nilär bulıp yata? - 4.IV.2008


►Milli muzeynıñ "Muzıka qoralları” cıyılma basması buldırıldı ►Tuqay bülägenä däğwaçı: şağıyr Rädif Gataş ►Kem ciñär: ispan duñğızımı, ällä tatar qazımı? ►Mari qorıltayına tatar borçıla





►Milli muzeynıñ "Muzıka qoralları” cıyılma basması buldırıldı



5 äprel könne Tatarstan Milli muzeyınıñ tuğan köne.

Tatarstan -- “Milli muzeynıñ muzıka uyın qoralları”

İdel buyı häm Tatarstan tarixında berençe tapqır Milli muzey tuplanmaları nigezendä “Muzıka uyın qoralları” katoloğı buldırıldı. Basma bitlärendä Milli muzeynıñ 110 yıllıq tarixında tuplanğan muzıka uyın qorallarınıñ cıyılması taswirlanğan.


Älege basmanı buldırunıñ töp maqsatı – törle säbäplär qarqasında könküreştä qullanılmıy torğan muzıka uyın qoralların fänni äyläneşkä kertü häm borınğı sänğät töre bularaq, muzıka mädäniätenä cälep itü tora. Bik bay eçtälekle älege basma etnografia häm muzıka belgeçläre öçen genä tügel, ä kiñ cämäğätçelekne dä qızıqsındırırlıq itep eşlängän, di Milli muzey citäkçese Gölçäçäk Näcipowa.


Älege basmağa quşımta bularaq awdiotälinkä dä äzerlängän. Anda İdel buyı xalıqlarınıñ muzıkal' äsärläre milli uyın qorallarında tanılğan muzıka ostaları başqaruında köylär yañğırıy.


--------------------------------------------------------------------------------------------

►Tuqay bülägenä däğwaçı: şağıyr Rädif Gataş

Bilgele şağıyr',ğäzällär, robağıylar autorı Rädif Gataş, “Mäñgelek susaw” şiğri cıyıntığı öçen Tuqay bülägenä täqdim itelä.


Tatar icatınıñ Tuqay büläge - Däwlät büläge däräcäsendä tapşırıluı, berdänber däwlättä, Tatarstanda ğına tapşırıla. Şul säbäple bu büläkne tapşıru da, häm aña layıq bulunıñ däräcäse dä ruxi qıymmätkä iä. Şul säbäple dä, bu könnärdä törle töbäklärdä yäşägän tatarlar Tuğan tel bäyräme könne Qazanğa ağıla. Härkemneñ Tuqay bülägenä iä buluçılarğa, qarap bulsa da qalasıları kilä, här tatarnıñ alar belän Qazannıñ zıyalı tatar moxitendä qaynaşası kilä.

Bıyıl Tuqay bülägenä 11 keşe däğwa itä. Ämma büläkneñ kemnärgä birelüe , 26 äpreldä G Tuqaynıñ tuğan könendä bilgele bulaçaq.


--------------------------------------------------------------------------------------------

►Kem ciñär: ispan duñğızımı, ällä tatar qazımı?


Qazanda dönyanıñ törle illärennän kilgän aş-su ostalarınıñ “Berdäm dönya” dip atalağan xalıqara bäygese bulaçaq.

Tatarnıñ qaqlağan qazı ispannarnıñ ıslağan duñğız botı belän bil alışaçaq. Älbättä, mäydanğa çığıp digändäy, turı mäğnäsendä tügel. Qazanda 9 äpreldän 11 nä qädär bulaçaq aş-su ostalarınıñ xalıqara bäygese waqıtında qaysı milli rizıqnıñ tämleräk ikänen açıqlayaçaqlar. Bu çaranı oyıştıruçılar, ispan xamonı belän qaqlağan qaznı çağıştırıp tämläp qaraw, qaznı dönyağa kiñräk tanıtu mömkinlege biräçäk dip belderä.

Bu çaranıñ ber maqsatı- Tatarstannıñ milli tabının häm tatar aş-suın dönyağa tanıtu bulsa häm şulay uq Qazanğa 2013 yılğı Uniwersiadanı ütkärü xoquqı alu öçen dä yoğıntısı bulırğa mömkin.

--------------------------------------------------------------------------------------------

►Mari qorıltayına tatar borçıla

Yoşqar-Olada yäşäwçe tatar Ramay Yuldaşev.
Äprel ayında Mari ile başqalası Yoşqar-Olada sigezençe mari qorıltayı uzaçaq. Bu qorıltayğa Tatarstannan da 10 qatnaşuçı häm 5 küzätüçe bularaq mari keşeläre saylandı inde. Tik marilar ğına tügel, Qazan häm Yoşqar-Olada yäşäwçe tatarlar da bu qorıltayğa bitaraf tügel. Äytik, Qazandağı Tatar ictimğıy üzägennän Yunıs Kamaletdinov tatar belän marinı dus, köräştäş dip atıy. Şul uq waqıtta ul mari xäräkätenä däwlät basımı köçle di.

Qazandağı tatar milli xäräkäte şulay uq “mari qorıltayı” dip atalğan xäräkättän bitär, bäysez sanaluçı Mari Uşem oyışması belän xezmättäşlekne qulayraq kürä.



--------------------------------------------------------------------------------------------

►Klänçe uquçıları başqa mäktäpkä kitte

Klänçe awılı
Bügenge köndä Kama Tamağı yaqlarında çit tele uqıtuçısın tabu da zur bälağä äylängän. Klänçe mäktäbeneñ 10-11 sıynıf uquçıları, ğıynwar ayında ğına “çit tel bulmağaç, sezgä attestat birelmi” digän süzlärne işetkäç, başqa mäktäpkä yörep uqırğa mäcbür buldı.


Başqa mäktäp uquçılarınıñ küpçelege inde qaya uqırğa keräçäklären täğäyenlägän bulsa, Klänçe mäktäbe uquçılarınıñ başında älegä çit teldän niçek tä imtixan tapşırıp, urta belem tanıqlığı alu probleması tora.


--------------------------------------------------------------------------------------------

►Äxmätov: "Xäkimovnı aldırıp Mäskäw Tatarstan citäkçelegen almaştırunı başladı"


Uzğan atnada prezident Miñtimer Şäymievneñ säyäsi kiñäşçese Rafail Xäkimovnıñ eştän alınuı respublikada zur şaw-şu uyattı. Cirle mäğlümat çaraları da älege temanı atna buyı iñ aldınğı xäbärlär rätenä çığardı.

Rafail Xäkimov eşennän alınğaç, küp kenä mäğlümat çaralarında, anı yaqlap häm ul başqarğan eşlärgä yuğarı bäyä birep yazılğan mäqälälär şaqtıy kürende. İmeş respublikada 20 yıl buyı başqarılğan barlıq säyäsi eşlär dä anıñ xezmäte häm xäzer ul kitkäç, nişlise bulır inde digän kebek.

Millät temasına kilgändä, gazetada “Başqortstan tatarları kongressı” räise Timerğäzi Ğälievnıñ Başqortstan prezidentı Mortaza Räximovqa distägä yaqın bülektän torğan möräcäğäten bastırğan. Biredä Başqortstanda yäşäwçe tatarlar problemaları kütärelä.
XS
SM
MD
LG