Accessibility links

чәршәмбе, 7 декабрь 2016, Казан вакыты 01:00

AQŞ prezidentı George Bush Xoravatiä belän Albaniäne NATOğa tarixi çaqıru uñayınnan qotlap, alarğa NATO häm Amerika isemennän tulı yaqlaw wäğdä itte.

Bu ike il uzğan atnakiçtä Buxaresttağı NATO samitında äğzalıqqa çaqıru alğan ide.

Xorvatia başqalası Zagrebta cıyılğan xalıq aldında çığış yasap Bush şulay uq bu illärne reformalarnı däwam itärgä çaqırdı.

"Xorvatiä belän Albaniägä NATOğa quşılu turında bu atnadağı çaqıru sezneñ zarur bulğan reformalar ütkäräçägegezgä häm NATOğa zur öleş kertäçägegezgä ışanıç belderüne añlata. Monnan arı sezneñ xalqığızğa berär qurqınıç yanasa, Amerika häm NATO sezneñ yaqqa basaçaq, häm bäysezlegezne berkem dä tartıp ala almıyaçaq," - dide Bush.

Xorvatiä premyer ministrı İvo Sanader Xovratiägä nıqlı yaqlaw kürsätkän öçen Quşma Ştatlarğa räxmät belderde.

Bush Zagrebqa Romaniä başqalasında ütkän NATO sammitınnan soñ kilde.

Bush Makedoniäneñ Gretsio belän üz isemenä bäyle qarşılığı säbäple NATOğa çaqıru ala almawına qızğanıç belderde häm Amerika Makedoniäneñ dä mömkin qädär tizräk NATOğa quşıluın teli dide.

Bügenge bu waqıyğada Makedoniä prezidentı Branko Çrvenqovskiy häm premyer-ministrı Nikola Gruyevski da qatnaştı.

Bush Bosniä-Hersegovina belän Montenegro da NATOğa taba barırğa tieş dide. Buxarest sammitında bu 2 il üzläreneñ NATOğa quşılu teläge turında nıqlap söyläşä başlarğa kiräklegen belderde.

Bush Könbatışnıñ Kosovo bäysezlegen tanuınnan soñ aña artı belän borılğan Serbiäne dä iskä aldı.

"NATO töbäktäge barlıq illärgä dä açıq. Bez Bosniä-Hersegovina belän Montenegronıñ äğzalıqqa taba intensiv dialog dip atalğan çirattağı adımnı yasawın xuplıybız. Häm min kiläsäktä irekle, çäçäk atuçı Serbiä dä Yewropa ğailäsendä üzeneñ urının tabıp kürşeläre belän tatulıqta yäşi başlar dip ömetlänäm," – dide Bush.

Yäkşämbe ul Soçida Rusiä prezidentı Vladimir Putin belän söyläşülär ütkärä. Bu Putin belän Bushnıñ prezidentlar bularaq soñğı oçraşuı bulaçaq.
XS
SM
MD
LG