Русия калаларындагы әйләнә-тирә мохитның нинди хәлдә икәнлеге белән кызыксына башласаң, әнә шундый нәтиҗәгә килергә мөмкин.
Якын-тирәдәгеләргә зыянлы парлар таратучы Казандагы 15 ягулык салу ноктасы хуҗалары бүгенге көндә ничек итеп кенә булса да санитар саклану аралыгын киңәйтү турында баш вата. Канунга күрә, бу аралык иң кимендә 50 метр булырга тиеш. Анда бензин парлары тирә-юньдәгеләргә зыян салмасын өчен агачлар үсү, яшеллек гөрләп тору мәҗбүри. Казан һәм районара табигатьне саклау прокуратурасы алга таба да канун бозучы мондый нокталарны ачыклауны дәвам итергә исәпли.
Әлеге афәттән котылуның ике юлы бар. Берсе- бу сәнәгать оешмасы һавага зарарлы матдәләр чыгаруны расланган таләпләргә туры килерлек итеп киметә ала. Икенчесе- якын-тирәдә яшәүчеләрне башка урынга күчерергә мөмкин. Билгеле булганча, икесе дә зур чыгымнар сорый.
Табиплар соңгы вакытта шундый зарарлы матдәләр таратучы ширкәтләр янында яшәүчеләр арасында яман шеш һәм башка авыруларның елдан-ел арта баруын әйтә. Халык үзе дә әлегә битараф. Түбәсеннән генә су үтмәсен. Ә нәрсә сулавына артык иске китми.
Әнә, Русиянең Череповец шәһәрендәге хәл игътибарга лаек, дип белдерә Рамил Әхмәтҗанов. Метал эшкәртү ширкәте тирәсендә яшәүчеләр Европаның кеше хокуклары мәхкәмәсенә үк барып җитеп, рухый зыян килгән өчен акча да түләткән, башка җиргә күчеп яшәү өчен тотылган чыгымнарын да каплаткан.
Бер яктан гади халык үзенең хокукларын һәм әлеге хокукларны яклаучы кануннарны начар белсә, икенче яктан Татарстандагы Роспотребнадзор вәкилләре җиренә җитәрлек итеп эшләми. Мисал өчен, Азнакай шәһәрендә меңләп кешенең сәламәтлегенә зыян салучы дистәгә якын ширкәт бар. Әмма, андагы санитар табиплар тикшерүләр үткәреп бу хакта “чаң сугарга” ашыкмаган. Бу ваемсызлык турында шикаять Роспотребнадзорның Татарстандагы башлыгына җибәрелгән инде.
