Accessibility links

сишәмбе, 6 декабрь 2016, Казан вакыты 23:02

Qayçandır Rusiäneñ aldınğı basması - "Kommersant"ta eşläp, prezidentlar arasında ğına yörgän häm şul eşe xaqında kitap yazğan Yelena Tregubova bügen adresın yäşerep yäşärgä mäcbür.

Putin çorında anıñ tormışı tämam üzgärep, ul axırğı çiktä Britaniädä säyäsi sıyınu sorarğa mäcbür buldı. Uzğan atnada Tregubovanıñ şuşı üteneçe qabul itelde häm Azatlıq radiosı anıñ belän söyläşep, bügenge Rusiä turındağı fikerläre belän qızıqsındı.

Zamanında Rusiäneñ yuğarı citäkçeläre belän zatlı säfärlärdä genä yörgän Tregubova xäzerge yäşäw urının yäşerep tota. Adresın ul xätta ildä qalğan ğailäsenä äytä almıy - säyäsi sıyınu alğan zatnıñ yäşäw şartları şaqtıy qırıs.

Tregubovağa Britaniädä säyäsi sıyınu, Mäskäw belän London arasındağı mönäsäbätlärneñ bik tä kierenke çorına turı kilde. Qayberäwlär, mondıy xälneñ "salqın suğış"tan soñ bulğanı yuq ide dip isäpli. Rusiä Aleksandr Litvinenkonı üterüdä şiklänelgän Lugovoynı britannarğa tapşırudan baş tarttı. Mäskäw üze räsmi Londonnı Boris Berezovski, Äxmät Zakaev kebek keşelärgä sıyınu birüdä ğäyepli.

İke yaq ta ber-berseneñ diplomatların quıp çığarğaladı. Moñardan tış Mäskäw Rusiädä britan mädäni üzäge bularaq eşlägän British Council oyışmasın üz eşen tuqtatuğa mäcbür itte, ä FSB Mäskäwdä britannarnıñ töp neft şirkäte British Petroleum idaräsen tentep çıqtı.

Yelena Tregubovağa Britaniädä säyäsi sıyınu menä şundıy şartlarda birelde häm ul üze xäzer Rusiägä tiz genä kire äylänep qayta almayaçağına ışana.

"(Rusiädäge) xakimiättä yäşeren xezmät başlığı bularaq Putin qorğan xäzerge rejim bulğanda min Rusiägä äylänep qayta almayaçaqmın, miña işeklär yabıq, çönki bu minem öçen ülem qurqınıçın tudıraçaq", di Yelena Tregubova.

Anıñ Rusiädä problemaları "Kreml astın qazuçı qissaları" digän kitabı çıqqannan soñ başlandı. Mäğlüm ki, Tregubova berniçä yıl däwamında jurnalistlarnıñ Rusiä prezidentı eşen yaqtırtip kilgän maxsus törkeme äğzası buldı. Häm kitabında ul räsmi waqiğälärdän bigräk Kreml eçendäge serlär, pärdä artında barğan eşlär turında yazğan ide.

Anda, mäsälän, ul çaqta FSB başlığı bulıp eşlägän Vladimir Putinneñ jurnalistnı üzen genä ber sushi restoranına aşqa çaqıruı, häm Tregubovanıñ annan säyer xislär belän kitüe äytelä. "Min axırğa qädär şunı hiç añlıy almadım - ällä ul mine üzenä "töşerergä" tırıştı, ällä inde yäşeren eşkä alırğa mataştı...", dip yazğan ide üz kitabında Yelena Tregubova.

Xäzege waqıtta ul yaña kitabın yazıp yata. Bu yulı inde üzeneñ Rusiädäge täcribäse, ildä barğan täräqqiät xaqında uylanuları turında. Häm Rusiädäge xällär uñayınnan ul açınıp bolay di:

"Minemçä, monı äytü bik küñelsez bulsa da, Rusiädäge reformalar, liberalläşterü omtılışı - bolar barısı da inde tämam. Bez şuşı böyek tarixi mömkinlekne ıçqındırdıq. Rusiä yänä isemnären genä üzgärtkän elekke KGB agentlarınıñ koloniäse buluğa äylänep qayttı. Yağulıqqa bay şuşı koloniä barı tik azsanlı neft häm gaz satuçıları öçen genä, ä alar üz baylığın başqaladan çittä yäşägän beräwgä dä birmi", di Rusiäneñ bügenge xäle turında jurnalist Yelena Tregubova.

XS
SM
MD
LG