Accessibility links

шимбә, 3 декабрь 2016, Казан вакыты 05:27

İtaliädä saylawlarda, irekle xalıq partiäse citäkçese, Silvio Berlusconi ciñep çıqtı. 3 tapqır xaqimiätkä kilgän Yewropanıñ iñ ölkän citäkçelärennän sanalğan Berlusconi “alğa taba İtaliänı awır könnär kötä” dip kisätte.


Saylawlarda berençe bulıp ciñgän Partito della Liberta isemle uñçı partiä citäkçese Silvio Berlusconineñ qızıqlı şäxsiäte, saylawdan elek mäğlümät çaralarında iğtibarnı cälep itte.

Köndäşläre arasında maqtanırğa yarata torğan citäkçe, monnan elek 14 yıl buyı xaqimiättä qalğan ide. Mäğlümät çaraları, reklama, tözeleş, iminiät häm aşamlıq sänäğate kebek kiñ qırda eşlägän säwdä çeltäreneñ başlığı bulğan Berlusconi, şul uq waqıtta AC Milan futbol komandası başlığı. Berlusconineñ şäxsi baylığınıñ 12 milliard dollardan kübräk buluı isäplänä.

Şäxsi tormışındağı uñışı belän xalıqta tirän täsir buldırğan Berlusconi uzğan 2006 yıl saylawında “bez buldırabız” şiğare belän çıqqan, Romano Prodigä tawışlarda az ber ayırma belän ciñelgän ide. Ciñelüen awır kiçergän Berlusconi koalisiä tözergä kileşmäde häm waqıtınnan elek saylaw uzdırırğa soradı. Häm telägäne buldı, xökümät möddäte betüenä äle 3 yıl qalğanda taraldı häm İtalia waqıtınnan alda saylawlarğa bardı. Xäzer Berlusconi tağın xaqimiät başında.

Läkin bıltır qaysı ber töbäklärdä çüp cıyılmawı säbäple zur protest çaraları bulıp alğan ilneñ problemı barı tik tirä yünne qaraw mäsäläse belän çiklänmi. Kiläse yıl Yewropa Berlege eçendä üseş bik kötelmägän ilne, iqtisadi problemnär dä borçıy.

Bu problemnärne Berlusconi üze dä yaxşı kürä, şuña ul saylanuı bilgele bulğaç ta däwlät kanalında yasağan çığışında ciñü belän üzendä zur cäwaplılıq xis itüen äytte:

“Bu saylaw näticälärenä qarap İtalia xalqınıñ miña şul qadär ışanıç kürsätüenä bik dulqınlandım, barsına da çıñ küñeldän räxmätläremne belderäm. Min kiläse yıl häm aylardağı mäşaqätle waqıtnı küz aldında totıp üzemdä zur cäwaplılq xis itäm. Läkin aldağı 5 yıl eçendä İtaliä öçen barlıq köçem häm täcribäm belän quldan kilgän qadär tırışaçaqmın”

Italiä dönyanıñ iqtisadi yaqtan iñ bay 7çe ile dip sanalsa Läkin İtaliä yewropada iqtisadi üseş yağınnan iñ zäğif illärennän. Yewropada ğomum alğanda 15 ilneñ urtaça 1.4 üseş miqtarı belän çağıştırğanda 0.3lıq üseş bik tübän. Xökümätneñ il eçendäge burıçları da şaqtıy küp. Monnañ qala däwlät eçendä brokratiä bik köçle.

Könyaqnıñ räxät häm üz cayında yäşäw räweşe, ilneñ säyäsi torışına täser itkän. Yewropanıñ disiplinle illäre belän çağıştırğanda İtaliä berlekneñ iñ totırıqsız xaqıimiätenä iä. Tarix buylap bu gel bolay bulğan. Barı tik 2001-2006 yıl Berlusconi xökümäte genä 5 yıl möddättä tarqalmıyça xaqimiättä qala alğan ide. Berlusconi üz möddäte waqıtında monnañ elek qılğan tırışlıqların däwam itterergä ömetlänä.
XS
SM
MD
LG