Accessibility links

җомга, 9 декабрь 2016, Казан вакыты 12:50

Putin Berdäm Rusiä räise bulırğa rizalıq birde. Prezidentlıqtan kitkäç tä ul säyäsi säxnädä qalaçaq. Berdäm Rusiä quäten tağı da arttıra. Rusiä sovet çorındağı ber partiäle sistemğa qaytamı?


Berdäm Rusiä firqaseneñ räise bulırğa rizalığın birep, Putin Kremldän kitkännän soñ üzenä säyäsi säxnädä urın alıp qına qalmadı, ä ilneñ yaña säyäsi sistemına ölge saldı, diärgä bula.

Moña qädär Putin prezidentlıqtan kitkäç, premier-ministr bulırğa rizalıq birgän ide.

Belgeçlär fikerençä, anıñ partiäne citäkläw qararı tağı da ähämiätleräk, bu aña, Rusiädä telägän qadäre idarä itergä mömkinlek birä. Çönki, Berdäm Rusiä xakimiättäge partiä genä tügel, ä ilneñ säyäsi, iqtisadi häm burokratik quäten üz eçenä alğan berläşmä bulıp tora.

"Xäzer ul Berdäm Rusiäne citäkli. Dimäk, Däwlät Dumasın, Federatsiä Şurasın, cirle parlamentlarnı kontrol itä. Ä alar gubernatorlarnı raslıy. Yağni, anıñ quäte bermä-ber arta" – di Olga Krıştanovskaya, Fännär akademiäsendä elitanı öyränü üzäge başlığı.

Belgeçlär fikerençä, Rusiädä, sovet çorın xäterlätkän ber partiäle sistem barlıqqa kilä. Töp xakimiät prezident, premier, yä spiker tügel, ä "general sekretar" qulında bulaçaq.

Älbättä, bu sistem bazar şartların iskä alıp, beraz yañartılıp qorıla. Berniçä partiä, berniçä namzätle saylawlar demokratiä tösmere birä. Ämmä töp xakimiät üzäk partiä qulında qala.

Medvedev bügenge çığışında, prezident bularaq, älegä partiägä kermiäçägen belderde. Berdäm Rusiä başlığı bularaq Putin Kremldä utırğan prezidentnı kontrol itä alaçaqmı?

"Küz aldına kiteregez, prezident Medvedev partiäsez, ya ğadi äğza, yä citäkçelek äzğası. Läkin partiäneñ citäkçese bit Putin. Yağni, bu prezidentnı ğına tügel, ä ğomumän, prezidentlıqnı zäğiflätä" di Liliä Şvetsova, Mäskäwdäge Carnegie üzäge belgeçe.

2001 yılda tözelgän Berdäm Rusiä Putinğa teräk bulıp xezmät itte. Putin prezidentlıqtan kitkäç, partiäneñ yoğıntısı kimer digän farazlar äytelgän ide. Bügenge waqıyğa, kiresençä, partiägä "ikençe sulış" birde, diärgä bula.

"Partiä üzgärtelergä, saylawçılar öçen açığraq bulırğa tieş. Ul üz mänfäğaten genä uylağan oçraqlı keşelärdän arınırğa tieş" dide partiäneñ yaña räise Vladimir Putin.

Belgeçlär fikerençä, bu wazyıfa Putinğa, premier bulğaç ta, üzen prezidenttan kim bulmağan, "saylanğan" citäkçe itep xis itergä mömkinlek biräçäk.

XS
SM
MD
LG