Accessibility links

пәнҗешәмбе, 8 декабрь 2016, Казан вакыты 05:16

Çärşämbedä Rusiä prezidentı Vladimir Putin ike könlek räsmi säfär belän Libiägä kilde. Energetika häm qoral ölkäsendä ike yaqlı kileşülär kötelä. Libiädäge neft yatmaların tikşerü eşlären Tatneft şirkäte alıp bara.


Tripolida ike könlek säfär waqıtında Vladimir Putin Libiä prezidentı Muammar Qaddafi belän neft, gaz, qoral satu häm dä bu ilneñ sovet çorınnan qalğan burıçları turında söyläşülär ütkäräçäk.

Libiä häm Aljir kebek Tönyak Afrika illäre Rusiäne genä tügel, Yewropa illären dä qızıqsındıra. Alar da andağı yatmalarğa ütep kerep üzläreneñ Rusiä yağulığına bulğan bäylelegen kimetergä teli.

Energetika ölkäsendä belgeç Federico Bordonaro fikerençä, Putin monı buldırmasqa tırışa.

"Putin Libiä belän Aljirda Üzäk Aziä illärendä eşlägänne eşlärgä teli. Bu oçraqta Könbatış illäre anda kerä almayaçaq" di .

Asılda Libuyada 50dän artıq kompaniä inde eşli, şul isäptän, Shell häm Exon kebekläre dä. Eş şunda ki, Libiädä neft östä yata, anı çığaru ciñelräk. Tatarstannıñ Tatneft şirkäte anda berençelärdän kilde. Tatnefneñ Libiädäge bülegen Nail Xäbibullin citäkli.
Tatnefneñ Libiädäge bülege citäkçrse Nail Xäbibullin

"Tatneftneñ Libiädä 4 blogı bar (Gazpromnıqı - 2), bu 18 meñ km2, Tatarstannıñ çirege digän süz. – di Nail Xäbibullin. – Xäzer tikşerü eşläre bara. Libiä cömhüriäte belän kileşü 30 yılğa tözelgän, 5 yıl tikşerenülärgä, 25 yıl – neft çığaruğa."

Nail bu turıda bezgä hawa alanında Putinnı qarşı alğan waqıtta söyläde. Söyläşülär çärşämbe kiç başlana, näticälär pänceşämbe bilgele bulaçaq.

Neft häm gazdan tış tağın qoral satu mäsäläse kütäreläçäk. İnterfax mäğlümätenä qarağanda Putin 2,5 millard dollar külämendä kileşü imzalarğa mömkin.

Qayber belgeçlär fikerençä, bu alış-bireş Libiäneñ sovet çorınan qalğan burıçlarınıñ ber öleşen sızıp taşlaw xisabına başqarılırğa mömkin. Cawap itep Tripoli Mäskäwgä energetika ölkäsendä taşlama yasıy ala.

Näq şundıy kileşü 2006 yılda Aljir belän ireşelgän ide.

Libiädän qaytu yulında Putin Sardiniä utrawında tuqtalış yasap, dustı äle genä İtaliäneñ premierı itep saylanğan Silvio Berlusconi belän kreşer dip kötelä.

XS
SM
MD
LG