Accessibility links

дүшәмбе, 5 декабрь 2016, Казан вакыты 17:37

Bağdad Mähdi ğaskärlärenä qarşı çaraların tuqtatmasa Moqtada äs-Sadr xökümätkä qarşı "açıq suğış" iğlan itäçäk.

Üz belderüendä Moqtada äs-Sadr bu – "soñğı kisätü" dide häm xökümätne "tınıçlıq yulına basarğa" çaqırdı. Şığı suğışçıları yulbaşçısınıñ bu belderüen şimbä könne Najaf şähärendä anıñ wäkile Säläh äl-Ubaidi uqıp birde.

"Ğiraq xökümätenä soñğı kisätü yasıym häm soñğı süzemne äytäm. Xökümät üzen tıyıp tınıçlıq yulına bassın yuqsa ul üzennän alda bulğan xökümätneñ yazmışına duçar bulaçaq. Ägär dä ul xökümätkä ğısyançılarnıñ ütep kerüen tuqtatmasa, bez suğışnı azatlıqqa qadär däwam itäçäkbez."

Sadr üze xäzer İrandadır dip farazlana. Ul şulay uq Nuri äl-Mäliki xökümäten AQŞ ğaskärläre belän buluın täñqitläp Ğiraqnıñ bäysezlegenä çaqırdı.

Sadr 2007 yılnıñ avgustında köç qullanunı tuqtatu kileşüen dä iskä töşerde. Monıñ urınına xökümät anıñ bülekçälären yabu häm anıñ keşelären üterü belän cawap birde, dide şığı suğışçılar yulbaşçısı.

Bağdad xökümäte Moqtasa äs-Sadrğa üz qaskärlären taratırğa quşqan ide. Monı eşlämäsä xökümät Mähdi köçlären säyäsättän tıyu belän yanadı.

Ul arada xökümät Basra şähärendä şığı suğışçılarına qarşı çaralar näticäle bara, dip belderde. Anda ülüçelär sanı mäğlüm tügel, ä menä başqalanıñ Sadr bistäsendä bäreleşlärdä comğadan birle 12 keşe hälak bulğan.

Köç qullanu şulay uq Nasıriä şähärendä dä däwam itte, kiçä biredä kommendant säğate tärtibe kertelde.

AFP mäğlümat agentlığı xäbär itüençä, kiçä kiç Moqtada äs-Sadr belderüe dönya kürgäç Bağdadnıñ Sadr bistäsendä mäçetlärdän "basıp aluçılarğa qarşı köräşkä" çaqıru yañğrağan. Tönnä yasalğan bu iğlannarda Ğiraq ğaskärlärenä "qardäşlärgä" qarşı suğışmasqa çaqırular bulğan.

Xalıq arasında qurqu xise arta, Bağdadta yäşäwçe beräw:

"Tağın suğış bulmasın dip telim, Ğiraqlılar üzlärenä qarşı suğışırğa tieş tügel. Sadr belderüe – tınıçlıq belderüe dip ışanam," - dip, barı tik tınıçlıq telägänen äytte....

"Bez suğışqa qarşı, bezgä tınıçlıq kiräk, bez ardıq. Min äs-Sadr bistäsendä yäşim, min kön sayın irtän 6da torıp eşemä barıp citer öçen 3 bistä arqılı ütäm. Qamawnı tuqtatsınnar, bez citärlek cäza aldıq inde, Sadr bistäse citärlek cafa kürde," - dip söyläde biredä yäşäwçe ir keşe.

Ğiraq häm AQŞ köçläre bistä tiräsendä diwar tözi başlağaç kierenkelek tağın da arttı. Bu diwarnı alar Sadr bistäsennän ilçeleklär häm xökümät binaları urnaşqan Yäşel Zonağa bulğan höcümnärne tuqtatu öçen dip añlattı.
XS
SM
MD
LG