Accessibility links

җомга, 9 декабрь 2016, Казан вакыты 07:04

İstanbulda Tuqay iskä alındı


İstanbuldağı Tuqay kiçäse asılda yäşlärne häm kiñeräk tamaşaçanı cälep itü öçen yaña çaralar kürüne taläp itüen isbatladı.

Tuqay Tatarstanda da yıraq diasporada da, yäğni borınğı Sovet illärennän çittäge tatarlar öçen simvol buluın däwam itä. Läkin şul bar ki Tatarçadan täm-läzzät alıp uquçılarnıñ sanı kimi bara. İnternet kebek modern texnologik çaralar bik üskän çorıbızda keşelärne nindi dä bulsa ber zalğa ciyıp çığış tınlatu çorı da betä bara. İstanbuldağı Tuqay şiğer kiçäsendä dä şundıyraq xäl buldı. Cıyılış 1,5 sägat sonğa qalıp başlandı. Bik ozaqqa suzılğan çığışlar ber börtek tıñlawçını bizderde. Tuqaynıñ tormışınnan kürsätelgän foтoräsemnärdä Tuqay nindi mesken xäldä wafat buldı digän syujetlarğa şul xätle qatı basım yasaldı ki, bezneñ qaharmanıbız şundıy mesken xälgä töşkän ikän, dimäk tatarlar üzläre dä anı tieşençä yaqlamağannar digän xis, qayğı häm borçılu tudırdı.
Tuqaynı iskä aluğa ber börtek keşe qatnaştı dibez, çönki zalda çama çamadan yıraq bulmas 40 keşe bar ide. Şularnıñ da un keşesennän artığı oyıştıruçılar, çığış yasawçılar häm alarnıñ yaqınnarı ide. Gomumän yäşlär ber qulnıñ barmaqları xätle dä yuq ide. Yarar Törkiädä üskän tatar balaları tatarçanı belmilär, ä Tatarstannan biregä uqırğa kilgän tatar studentlar da mı belmilär digän soraw tua. Döres asılda kübese belmi, Tuqaynı işetkännäre dä yuqtır. Häm niçä sägatkä suzılaçaq çığışlar tıñlarğa da telämägännärder. Çönki İstanbul kebek zur ber şähärdä küñel açarlıq çiksez mömkinleklär bar. Ber başqa säbäp tä hiç şiksez İstanbuldağı tatarlarnıñ öç-dürt törkemgä bülenüennän tora.
Qızıqlı küreneş bularaq isä oçraqlı räweştä İstanbulğa kilgän New York Tatarları oyışmasınıñ elekke räislärennän İldar Agiş belän xatını, Sanfransisco Burlingame Tatar cämgiäte imamı Dayan Safar belän xatını häm Eskişähir Tatarları oyışmasınıiñ yaña räise Vadit Erdenneñ bu kiçägä qatnaşuların äytä alabız.
İstanbuldağı Tuqay kiçäse asılda yäşlärne häm kiñeräk tamaşaçanı cälep itü öçen yaña çaralar kürüne taläp itüen isbatladı. Tuqay bezneñ simvolıbız diyü genä citmi ikän. Mäsäläneñ başqa yağı isä Tatarstannıñ üzendäge ruxi häm mädäni töşenkelekneñ diasporağa da, yıraq diasporağa da tiskäre yoğıntı yasawı.
XS
SM
MD
LG