Accessibility links

шимбә, 10 декабрь 2016, Казан вакыты 17:49

Düşämbedä Olimpiä utı Tönyaq Korea başqalası Pxenyanğa citte. Moña qädär anıñ bu kommunistik ildä bulğanı yuq ide äle. Tönyaq Koreadan soñ ul Vietnamğa häm annan soñ Qıtayğa kiläçäk.


Moña qädär här ildä diärlek ızğış iärtep yörgän Olimpiä utı totalitar kommunistik Koreada, nixayät, tınıçlıq aldı. Başqala Pxenyanda anı ber törkem ölkän yäştäge keşelär qarşıladı. Korea milli kiemenä kiengän xanımnar häm Könbatış kiemle irlär utnı 20 çaqırım çaması ozata bardı, qulındağı qızıl çäçäklär bolğap utqa "Xuş kiläseñ!" dip qıçqırdı.

Qıtaydağı keşe xoqquları torışına häm Tibettağı bastırularğa protest belderüçelär, Pekin Olimpiä uyınnarın ütkärergä layıqlı tügel dip, här ildä diärlek, utnıñ yulına töşergä, anı sünderergä tırıştı.

Äytik, Pxenyanğa qadär Olimpiä utı Könyaq Korea başqalası Seulda buldı. Utnı häm şähärdäge tınıçlıqnı saqlawğa 8 meñ politsiä xezmätkäre, şul isäptän terrorğa qarşı köräşüçe maxsus törkemnär cälep itelde.

Seul uramnarında 300 läp keşe, şul isäptän Tönyaq Korea wäkilläre, Tönyaq Korea qaçaqlarınıñ Qıtaydan köçläp quıluına häm Tibettağı xällärgä protest belderde.

Berük waqıtta Seulda Qıtay xakimiäten yaqlawçılar, Pekinnı qähärlägän öçen Könbatışqa tänqit belderüçelär dä bar ide. Meñlägän qıtaylı qızıl älämnär bolğap, "Qıtayğa räxim itegez!", "Olimpiada ul säyäsät tügel!" digän şiğärlär qıçqırdı. Könyaq Koreada 30 meñ çaması qıtaylı uqıy.

Olimpiä uyınnarı Qıtayda ütergä tieşme digän sorawğa Seula uramnarındağı keşelär törleçä cawap birä.

"Ägär Tibet häm uyğırlar mäsäläse xäl itelsä, bu Olimpiä utınıñ mäğnäse kübräk bulır ide, bolay niçekter uñaysız" di Li Yong-kuk isemle Korea keşese.

"Seul Olimpiä uyınnarınnan soñ 20 yıl ütügä, 8 avgustta uyınnarnı Qıtay qarşı ala. Barısı da yaxşı üter dip ömetlänäm" di Li Gil-nam isemle keşe.

Seulda Olimpiä utın ozatu waqıtında Qıtay studentlarınıñ qılanışı Könyaq Korea räsmiläreneñ dä açuın çığardı. Könyaq Koreanıñ tışqı eşlär ministrlığı bu uñaydan Qıtay ilçesenä tirän borçılu belderde. Xäbärlärdä qarağanda, ilçe Qıtay studentları öçen ğafu ütengän.


XS
SM
MD
LG