Accessibility links

Кайнар хәбәр

Abxaz nizağında taraflarnı sabırlıqqa öndilär


Üz däğwaların abxaz yağı şuşı qaldıqlar belän dälilli
Üz däğwaların abxaz yağı şuşı qaldıqlar belän dälilli

Abxaziädän kilgän mäğlümät inde äkrenläp suğış qırınnan alınğan xäbärlärne xäterlätä bara. Suxumdağı xakimiät abxaz kügendä Gruziäneñ keşesez ike küzätü oçqıçın bärep töşerüen belderde, Tiflis isä monı şunda uq kire qaqtı.

Abxazlarnıñ atna azağında tağın ike gruzin küzätü oçqıçın bärep töşerüe turındağı xäbär Tiflisneñ Mäskäw belän araların tağın da qızdırıp cibärde.

Gruziäneñ tışqı eşlär ministrlığı gruzin yağınıñ nindi dä bulsa oçqıçlar cibärüen kire qağıp, abxazlarnıñ şuşı xäbären "safsata" dip atadı.

Ä inde Abxaziäneñ separatist xakimiäten üz qanatı astına alğan Mäskäw şunda uq Tifliskä taşlanıp, andıy oçışlar qanunsız bulıp tora dip belderde häm Gruziä prezidentı Mixail Saakaşvili xökümäten "kürälätä kierenkelekne arttıruda" ğäyepläde.

Gruziä parlamentındağı tışqı eşlär komitetı räise Konstantin Gabaşvili, Rusiä yağı şulay itep ğäyepne gruzinnarğa ğına tağarğa teli, dip isäpli:

"Bu yulı berni dä bulmadı. Monı barı tik urıslarnıñ ğädättägeçä gruzinnarnı başqalarğa agressiv itep kürsätergä tırışuı dip kinä atarğa mömkin", di Gruziä parlamentı deputatı Gabaşvili.

Mäskäw abxazlarnıñ Gruziädän ayırılu telägen elek tä yaqlap kilde, ä inde Kosovo üz bäysezlegen iğlan itkäç Rusiä şuşı yaqlawın bermä-ber arttırdı häm xätta ğämäli çaralar da kürä başladı.

Uzğan atnada Rusiäneñ saqlanu ministrlığı Abxaziädäge tınıçlıq saqlaw köçläre sanın arttıruı turında iğlan itte, monı ul gruzin yağınıñ abxazlarğa qarşı köç tuplawı belän añlattı.

Ul arada Könbatış, ayırım alğanda, Yewropa Berlege abxaz nizağına qatnaşı bulğan bar taraflarnı sabırlıqqa, ayıq aqıl belän eş itügä öndi häm alarnı üzara ışanıç tudırırlıq ğämällär qıluğa çaqıra. Kierenkelekne arttırırlıq ğämällärdän totılıp toruğa Aq yort ta öndi.

Düşämbe kiçen Quşma Ştatlar kongressı Abxaziä tiräsendäge wäzğiätne tikşerergä häm Gruziä belän Rusiä arasındağı mönäsäbätlärgä qarağan maxsus belderü qabul itärgä cıyına.

Alınğan xäbärlärgä qarağanda, şuşı belderü Mäskäwgä qarata şaqtıy qırıs eçtälektä yazılğan, anda Rusiä yağınıñ Gruziädän ayırılırğa telägän abxaz xakimiäten yaqlawı asılda xökem itelä. Washingtonda çınnan da, Mäskäw abxazlarnı Tiflistäge xökümätneñ Könbatış belän yaxşı mönäsäbättä buluı, anıñ NATOğa quşılırğa teläwenä genä üç itep yaqlıy, digän fikerdä toralar.

Ämma kongressmennar arasında Rusiägä qarata andıy qırıs möğämälä aluğa qarşı çığuçılar da bar. Şularnıñ berse Californiä respublikanı Dan Rohrbacher:

Rohrbacher fikerençä, härkemgä qarata da ber prinsip bulırğa tieş - kosovarlarnıñ da üzbilgelänü xoquqı bar, çeçennärneñ dä, häm şul isäptän Gruziädän ayırılıp yäşärgä telägännärneñ dä.
XS
SM
MD
LG