Accessibility links

шимбә, 3 декабрь 2016, Казан вакыты 14:47

Ciñü bäyrämen Rusiä bıyıl da zur xärbi parad belän bilgeläde. Sovetlar berlege tarqalğannan birle berençe märtäbä anda bu yulı awır qorallar da kürsätelde.

Tügäräk bäyräm bulmasa da bıyıl Rusiä citäkçeläre Ciñü könen bik zurlap bilgelärgä buldı. Moña bälkem dä ildä yaña prezident buluı tä'sir itkänder, gärçä däwlät telekanalında paradtan xäbär birüçe adäm anda qatnaşuçılarnı sanap kitkändä berençe bulıp elekke prezident, xäzer premyer-ministr Putinne äytte, annarı ğına cirat yaña ilbaşı Medvedevkä citte.

Zurdan qubıp ütkärüneñ töp säbäbe başqa cirdä dä yata ala.
Paradta zamança qoral - Topol raketaları da kürsätelde
Ciñü paradı ul İkençe dönya suğışında hälak bulğan 27 millionlap sovet keşesen iskä alu çarası ğına tügel, berençe çiratta ilneñ yaña çordağı xärbi qüäten, zamança qoralların kürsätü mömkinlege dä.

1991-nçe yılda Sovetlar berlege tarqalğannan birle bıyılğı xärbi paradta berençe märtäbä tanklar häm xätta strategik raketalar da kürsätelde. Bu turıda färmannı prezident çağında äle Putin çığarğan ide.

Bäyrämneñ üzen inde ul äle genä bilgelängän premyer-ministr bularaq qarşılıy. Ä töp notıqnı isä Rusiäneñ yaña prezidentı Dmitri Medvedev yasıy.

Waqiğäneñ nindi ruxta buluı Medvedevneñ çığışında da sizelä - anda ul, misal öçen, yaña suğışlarğa kiterä alırlıq cawapsızlıq ambitsiäläre turında äytä.

Medvedevneñ prezident bularaq berençe xärbi paradı
"Bez başqa illär eşenä tıqşınu häm çiklärne yañadan bilgeläw maqsatında rasaçıl häm dini näfrät çäçü, tar täğlimätlär häm ekstremizm terrorın taratu omtılışların bik citdi alırğa tieş", dip kisätä Rusiäneñ yaña prezidentı Dmitri Medvedev.

Putinneñ ezlekle häm urını belän täkäbber dä tışqı säyäsäte Rusiäne NATO illäre, Amerika Quşma Ştatları häm Könbatış belän tığızraq mönäsäbätlär urnaştırırğa telägän qayber elekke sovet respublikları belän dä kierenkelekkä kitergän ide.

Monı Rusiä eçke berdämlegen nığıtu, sovetlardan soñ barlıqqa kilgän ideologik buşlıqnı tutıru sürätendä alıp bara. Tıştan doşman ezläw bu eşne ciñeläytä, ä inde aña qarşı torırlıq köç-qüät buluın kürsätü öçen Ciñü paradı iñ qulay mömkinlek bulıp tora.

Xakimiätneñ moña bik citdi qarawın şul da kürsätä - xärbi paradlar bıyıl başqala Mäskäwdä genä tügel, bar il buylap, ere şähärlärdä dä uzdı.
Sovetlar berlegendä töp bäyräm bulıp 7-nçe noyäbr, üktäbr inqilabı köne sanalsa, xäzerge Rusiädä iñ olı tantanalar näq menä Ciñü könendä uza.
XS
SM
MD
LG