Accessibility links

пәнҗешәмбе, 8 декабрь 2016, Казан вакыты 23:06

Serbiädä waqıtınnan alda parlament saylawı ütä. Könbatışqa yöz totuçı prezident Boris Tadiç koalitsiäse belän millätçe Radikal partiäneñ köçe ber-berenä bik yaqın.

Bu saylawda Serbiäneñ aldağı yazmışı xäl itelä. Saylaw näticäse Serbiäneñ Yewropa Berlegenä integrasialänüen yäki izolatsia yulına kire qaytuın añlata ala.

Bu saylaw Kosovo bäysezlek beldergännän soñ eçke qarşılıqlar çığu näticäsendä mart ayında koalitsion xökümät tarqalğannan soñ iğlan itelde.

Ul qarşılıq Yewropa Berlegeneñ Kosovo bäysezlegenä yardam itüenä niçek itep cawap birü turında urtaq fikergä kilä almawdan ğibarät ide.

Millätçelär Brüsselgä art belän, Mäskäwgä yöz belän borılırğa täqdim itte. Könbatış yaqlı firqälär isä, Yewropa Berlegenä bik açuları çıqsa da, iqtisadıy maqsatlarnı küdä totıp Brüssel belän yaqınayu yulın däwam itärgä kiräk dide.

Şulay itep, bu saylawnı axır çiktä menä şuşı 2 täqdimne xalıq referendumına çığaru dip bäyäläp bula.

Saylaw komissiäse tawış birüçelärneñ moñarçı kürelmägän däräcädä küp qatnaşuın belderde.

Brüssel bu saylawnı zur iğtibar belän küzätä. Saylaw aldınnan, bu atnada ul serblarnıñ mönäsäbäten yaxşırtu maqsatında Yewropa Berlegeneñ 17 ilenä viza öçen qıybat xaq aludan baş tartuın belderde.

Uzğan atnada isä ul Serbiä belän Totrıqlandıru häm yaqınayu kileşüen imzaladı. Bu kileşü Berlek äğzası buluğa taba berençe adım sanala.

Bolar Boris Tadiç citäkçelegendäge, könbatış yaqlı Demokratik Partiäneñ ciñüenä ömetne arttırdı. Tadiç häm anıñ tarafdarları kileşüne Serbiäneñ Yewropa Berlegenä quşılu yulınnan baruın kürsätüçe işarä dip atadı.

Belgradta üz tawış birgännän soñ Tadiç Serblar Yewropa Berlegenä quşılunı saylar dip ömetlänüen äytte. "Min Serbiä xalqı Yewropadağı kiläçäk öçen häm bezneñ Kosovodağı xoquqıy mänfäğätlärebezne mömkinleklärebezgä qarap yaqlaw öçen, territorial berbötenlegebezne häm suwerenlığıbıznı yaqlap tawış biräçäk dit tulısınça ışanam," - dide Tadiç.

Ämma şulay uq küp tawış cıyarğa ömetlänüçe millätçe Radikal firqa Yewropa Berlegen serblarnı könbatış firqälärgä tawış birergä cälep itü öçen yalğan wäğdälär birüdä ğäyepli.

Xätta Tadiçnıñ elekke koalitsiadäge berektäşe, premer-ministr wazıyfaların ütäwçe Vojislav Koştunica Yewropa Berlege belän imzalanğan kileşüne tawışlarnı satıp aluğa tiñläde.

Serbiä Kosovodağı alban xökümäteneñ häm BMO idaräseneñ qarşı buluına qaramastan Kosovoda da parlamentqa häm cirle şuralarğa saylawlar ütkärä.

Küzätüçelär fikerençä, ägär bu parlament saylawında Bryüselgä qarşı yäki anıñ yaqlı firqäneñ berse dä xälitkeç küpçelekkä ireşä almasa, Serbiädä yaña totrıqsızlıq çorı başlanaçaq.

Kosovodağılarnı da isäplägändä, barlığı 6.7 million saylawçı terkälgän.
XS
SM
MD
LG