Accessibility links

җомга, 9 декабрь 2016, Казан вакыты 16:49

ämma bu yul ciñel bulırğa oşamağan. Yäkşämbedä Serbiädä uzğan parlament saylawları, ildä ütämillätçel xislärneñ kiñ taraluına qaramastan küpçelek xalıqnıñ barıber Yewropa belän bergä barırğa teläwen kürsätte.

Ämma yaña xökümätne tözü ber dä ciñel bulmasqa oşap tora. Reformaçıl köçlär, berençe çiratta prezident Boris Tadiçneñ Demokratik partiäse, qazanğan tawışlar sanı yağınnan berençe torsa da, ul Serbiä parlamentında alay da tulı küpçelekkä ireşä almadı. Yäğni xökümät qoru öçen aña başqa ber säyäsi köç belän berläşergä kiräk bulaçaq.

Ä andıy köç ofıqta älegä kürenmi - parlamentqa ütkän başqa partiälärne, alarnı yaqlaw küpkä azraq bulsa da, barısı da millätçel tarafta tora. Mäğlüm ki, bu saylaw Kosovonıñ Serbiädän ayırılıp üz bäysezlegen iğlan itüennän soñ oyıştırılğan ide, yäğni tawış birü millätçel xislärneñ iñ yuğarı noqtasına citkän ber mizgeldä uzdı.

Prezident Tadiç tarafdarlarınıñ uñışı şuña da kötelmägän buldı, aldan ütkärelgän fiker beleşü näticäläre dä, Balkandağı wäzğiätne küzätep baruçı belgeçlärneñ farazları da ciñüne aldan uq Tomislav Nikoliçneñ radikal partiäsenä birep quyğan ide.

Ämma serb radikalları tawışlarnıñ 29-lap qına protsentın qazana aldı, ä menä Tadiçneñ "Yewropa Serbiäse öçen" digän berläşmäse 39 protsent yaqlawğa ireşte. Älegä şuşı berläşmäneñ barlığı 250 urınlı parlamentta, Skupçinada 103 deputatı bulır dip farazlana.

Xökümät qorırlıq küpçelek öçen Tadiç partiäse xäzer berektäş ezli başlarğa tieş bulaçaq - mömkinleklär ällä ni zur tügel, döresräge, yuq diärlek.

Radikallar belän bu mömkin tügel, alarnı qapma-qarşı qaraşlar ayırıp tora. Elekke premyer-ministr Vojislav Koştunica da xäzer, Könbatışnıñ Kosovo bäysezlegen yaqlawına räncep, Tadiç belän berläşergä telämäwen äytä.

"Bezneñ prezident Tadiç partiäse
belän ayırmalıqlarnı beterep bulmıy, bez üz säyäsätebez belän alış-bireş itmiäçäkbez, ul üzgärmäyäçäk. Däwläti häm milli säyäsätkä qarağan prinsiplarıbız bez waz kiçerlek närsä tügel", di Koştunica.

Skupçinağa ütkän millätçel köçlär - şul uq Koştunicanıñ demokratları, Nikoliçneñ radikalları häm elekke prezident Miloşeviçneñ sotsialistları üzara kileşep xökümätne Tadiç partiäsennän başqa, yäğni ciñüçedän başqa ğına da qora ala.

Tomislav Nikoliç şuña ömetlänä dä.

"Xäzer Tadiçneñ Demokratik partiäsennän başqa ğına berektäşlek tözü mömkinlege bar, üz tarafdarlarınıñ bäyräm itüen yaña xökümät tözüçelär tantanası itep kürsätü öçen Tadiçnıñ xaqı yuq", dip kisätkän ide düşämbegä qarşı töndä serb millätçeläre başlığı Nikoliç.

Serbiäneñ yaña parlamentı yün başında cıyılıp, xökümät iñ soñ digändä sintäbr urtasına tözelergä tieş. Aña qädär ölgermäsälär ilne yaña saylaw kötä.
XS
SM
MD
LG