Accessibility links

якшәмбе, 4 декабрь 2016, Казан вакыты 07:05

Serbiädäge parlament saylawı näticäläre şaqtıy ğına xalıqnıñ Yewropa belän bergä bulunı yaqlawın kürsätsä dä, säyäsi partiälär öçen ifrat ta qatlawlı wäzğiät tudırdı - xökümät qoru öçen xäzer kileşä almaslıq partiälärneñ üzara kileşüe kiräk.

Prezident Tadiçneñ yewropaçıl demokratların elekke diktator Miloşeviç sotsialistlarına qodalap bulırmı? Cawap, berençe qaraşqa, kön kebek açıq - älbättä, yuq. Bu ike säyäsi köç arasında här ölkädä dä diärlek şundıy tirän qarşılıqlar bar ki, alarnıñ nindi dä bulsa berektäşlek qora aluına berkem küz aldına da kiterä almıy.

Ämma serb basmaları bu könnärdä, Boris Tadiçneñ Demokratik partiäse ilneñ yaña xökümäten sotsialistlar belän tözü turında kileşügä yaqın tora, dip yaza. Şuşı partiälärneñ bersennän dä älegä raslaw kilmäde.

Şul ğına mäğlüm - Sotsialistlar partiäse tiräsendä xäzer Tadiç wäkillärennän tış serb millätçeläreneñ Radical partiäse keşeläre dä, elekke premyer-ministr häm şulay uq ayawsız millätçe Koştunicanıñ tarafdarları da yöri - serb parlamentı Skupçinada barı tik 20 genä urını bulğan sotsialistlar "patşa yasawçı" ber säyäsi köçkä äylände.

Sişämbedä Boris Tadiç "ilne Yewropa berlegenä kiterä alırlıq, totrıqlı wä iqtisadta uñışlı xökümät qorunı yaqlawçı" qayber partiälär belän räsmi bulmağan söyläşülär başlap cibärüen äytkän ide.

250 urınlı parlamentta Tadiç demokratlarınıñ 102 deputatı bar, ämma xökümät qoru öçen anda kimendä 126 tawış kiräk bulaçaq.

Tomislav Nikoliçneñ radikalları 77 urın qazandı, ämma ifrat ta millätçel qaraşlarda torğan häm Rusiä belän berläşüne alğa sörgän bu partiäneñ Yewropa yaqlı demokratlar belän urtaq tel tabuı mömkin sanalmıy.

Andıy mömkinlek elekke premyer Koştunica partiäse belän dä yuq diärlek - anıñ Skupçinadağı 30 deputatı Tadiç partiäsenä bik citär ide, ämma näq menä Koştunicanıñ mart ayında Tadiç partiäse belän kileşä almıy xökümät berektäşlegennän çığuı Serbiädä yaña saylaw ütkärügä kitergän ide.

Prezident Tadiç, ni genä bulsa da Serbiä üzen Yewropa ile bularaq bilgelärgä häm Yewropa Berlegenä omtılırğa tieş, dip sanıy, ä Vojislav Koştunica isä Könbatışnıñ Kosovo bäysezlegen tanuına räncep, ilen pravoslav qärdäşläre yäşägän Rusiä belän bäylärgä tırışa.

Bolar barısı da xökümät qoru söyläşülären alıp barılıq berdänber köç itep Boris Tadiçkä näq menä sotsialistlar partiäsen genä qaldıra. Slobodan Miloşeviç bärep töşerelgännän birle sotsialistlarnıñ inde xökümättä bulğanı yuq ide.

Berük waqıtta sotsialistlarğa häm alarnıñ citäkçese İvica Daçiçqa millätçelär yağınnan da bik zur basım yasala, alar sotsialistlarnıñ prezident Tadiç belän tügel, ä üzläre belän berläşüen teli, dip xäbär itä Serbiä matbuğatı.
XS
SM
MD
LG