Accessibility links

якшәмбе, 4 декабрь 2016, Казан вакыты 11:19

Rusiäneñ çirattağı xökümäten tözü ällä ni zur yañalıqlar kitermäde - küp kenä ministrlar üz urınnarın saqlap qala aldı. Räsmi xakimiät şulay itep elekke säyäsätneñ "däwamlılığın" kürsätergä teläde. Ämma ber üzgäreş anda iğtibarnı şunda uq cälep itte.

Vladimir Putin belän yaña xökümätkä anıñ küpyılğı "şäwläse" - yaqın yardämçese İgor Seçin dä küçte. Moña qädär ul Putin prezident bulğanda, anıñ idaräsendä ide, anı xätta Mäskäw Kirmäneneñ "sorı ğalicanäbe" dip tä yörttelär.

Xökümättä eşläp Seçin cämäğätçelek küzennän elekkege tösle bik yäşerenä almayaçaq, xäzer ul premyernıñ urınbasarı itep bilgelänä, yaña eşendä şuşı vitse-premyer industriä, energetika häm tabiği baylıqlar ölkäsendäge eşlärne qarap baraçaq.

Vladimir Putin belän anıñ säyäsi karyerası başınnan uq bergä buluına, Rusiäneñ yuğarı citäkçelegendä 8 yıl utıruına qaramastan, Seçin turında mäğlümät yuq diärlek. Prezident idaräsendä eşlägändä ul cämäğätçelek qarşına räsmi töstä 2 märtäbä genä çıqtı. Anıñ aña qädärge tormışı da tomanğa kümelgän - biografiäsendä turıdan-turı äytelmäsä dä, İgor Seçin dä karyerasın elekke KGBda başlağan dip sanala. 80-nçe yıllarda ul Afrika illärendä xärbi tärcemäçe bulıp eşlägän, anıñ portugal telen belüe mäğlüm.

Seçinneñ şuşı serlelege, prezidenttan başqa berkemgä dä xisap totmawı anıñ turında törle farazlar çığuğa kiterde - anı yış qına yuğarı xakimiättäge Piterbur çekistları äşnälegeneñ başlığı itep sürätlilär. Ul däwlät rolen köçäytüne, iminlek köçlären nığıtunı, ere industriäne xökümät qulında totunı yaqlıy dip sanala.

Seçin şulay uq YUKOSnı kire däwlät qulına alunı, säyäsi omtılışları bulğan häm Putingä tieşle xörmät kürsätmägän Mixail Xodorkovskine törmägä utırtunı oyıştıruçı bulıp tora dip tä farazlana.

Däwlät qulındağı "Rosneft" şirkäteneñ idarä şurasın citäklägän şuşı adäm "Tatneft" häm "Başneft"ne dä yotu telägen belderä dip yazğan ide zamanında Rusiä matbuğatı.

İdarä dilbegälären ğädättägeçä arttan ğına, xalıqqa bik kürenmi genä tartıp utıru ğädäte Seçingä kübräk turı kilsä dä, xökümätkä bilgelänüe anı xäzer eşen elekkegä qarağanda açığraq alıp baruğa mäcbür itäçäk. Başqalar belän qarşılıqlar çıqqan oçraqta da xäzer alarnı yäşerü awırraq bulaçaq.

Ä qarşılıqlar bulırğa oşap tora. Yaña xökümättä iqtisadi säyäsätne finans ministrı häm şulay uq vitse-premyer, irekle bazar tarafdarı bularaq tanılğan Aleksey Kudrin alıp baraçaq dip sanala. Ämma Rusiä iqtisadınıñ umırtqa söyägen täşkil itkän däwlät korporatsiäläre häm yağulıq sektorı Seçin qaramağında bulsa, ildä qararlar çığaru eşendä haman da bazar tügel, ä saray prinsipları, säyäsi uyınnar, intrigalar östenlek itäçäk digän süz.

Seçinne xökümätkä quyunı Rusiä eşmäkärläre däwlätneñ bizness eşlärenä tağın da nığraq tıqşınuın añlatqan ber bilge itep kürä.
XS
SM
MD
LG