Accessibility links

шимбә, 10 декабрь 2016, Казан вакыты 10:01

İzraildä äytkän qayber süzläre öçen demokratlar prezident Bushnı utlı tabağa bastırmaqçı - çığışlarınıñ bersendä ul demokrat nämzät Barak Obamanı natsilarnı oçındıruçılarğa tiñlägän işarä yasadı.

Demokratlar härxäldä şulay dip belderä. Aq yort isä Bush süzlären şulay täfsirläwne kire qağa.

Bäxäs asılda Bushnıñ İzrail parlamentı knessetta yasağan çığışındağı ber özek tiräsendä bara. Anda ul Xämas häm Hizbulla kebek törkemnärneñ İzrailgä qarata doşmanlığı häm İran prezidentı Mäxmüt Äxmädinecad turında söylägän ide.

"Qayberäwlär, bezgä terrorçılar häm radikallar belän söyläşülär alıp barırğa kiräk dip uylıy kebek. Bezneñ mondıy axmaq ilüziälärne inde elek tä işetkän bar. Natsi tankları 1939-nçı yılda Pol'şağa kergändä, ber amerikan senatorı "İ Allam, Hitler belän aldan söyläşä alğan bulsam, eş moña qädär barıp citmäs ide", dip beldergän ide. Monı bezgä niçek tieş şulay atarğa kiräk - bu tarix tarafınnan qabat-qabat kire qağılğan yawıznıñ küñelen kürü ğädäte", dip belderde knessetta amerikan prezidentı.

Anıñ demokrat köndäşlären bu süzlär çın mäğnäsendä yarsıttı - eş şunda ki, prezident yarışına çıqqan töp nämzätlärneñ berse, Barak Obama, üzeneñ ägär dä inde Aq yortqa saylana qalsa, İran tösle Amerikağa doşmani illärneñ citäkçeläre belän dä oçraşırğa äzer buluın äytkän ide.

Demokratlar xäzer, Bush natsilarğa tiñläwne näq menä Obamağa qarşı höcüm yasaw maqsatında qullandı dip isäpli. Demokrat senator Joseph Biden respublikan prezidentnıñ borıçlı süzlären "çep-çi yalğan" dip atadı.

Obama üze bu uñaydan maxsus belderü yasap, Bushnı "şom salu säyäsätenä" quşıluda häm säyäsi höcüm yasawda ğäyepläde.

Demokratlar partiäseneñ bu mäs'älädäge qaraşın açıgraq häm täfsille itep Wäkillär pulatı citäkçese Nancy Pelosi bilgeläde:

Nancy Pelosi, şikle belderüe belän prezident Bush däräcäsen genä töşerä, dip uylıy

"Bezdä şundıy tärtip, ğädät bar - prezident çittä bulğanda bez anı tänqitlämibez. Häm bu prezident öçen dä şulay bulırğa tieş dip uylarğa mömkin - yäğni çittä ul da amerikannarnı tänqitlämäskä buldıra ala. Minemçä, prezident eşlägän eş ul prezident däräcäsennän tübän ber ğämäl bulıp tora", di Pelosy häm härber citdi keşe Bush süzlärennän çitläşer digän ömeten belderä.

Aq yort bar bu fiker tufanına barı tik, Bush süzläre ayırım ber şäxesne küzdä totmıy ğına äytelgän ide, dip belderä. Prezidentnıñ matbuğat wäkile Dana Perino, yuğarı urınğa däğwalağan nämzätlär qaywaqıt bar dönya alar tiräsendä genä äylänä dip uylıy, digän farazın äytte.

XS
SM
MD
LG