Accessibility links

пәнҗешәмбе, 8 декабрь 2016, Казан вакыты 14:52

Üzbäkstan prezidentı İslam Kärimov äxlaq turında yaña kitabın bastırıp çığardı. Kitap yazu Üzäk Aziä citäkçelärneñ yaratqan şöğelenä äylänep bara.


Döresen äytkändä, xalıq bu kitaplarnı "keşe uqımıy torğan kitaplar" dip atıy. Türälär isä bastıruın däwam itä.

İslam Kärimovnıñ soñğı kitabı "Äxlaq ul ciñelmäs köç" dip atala. "Soñğı" süze bu oçraqta törtterü tügel. Kärimov Üzäk Aziädä iñ mul yazuçılarnıñ berse. Anıñ kitapları 30 million danä külämendä taralğan.

Uzğan atna Üzbäk televideniesendä kitapnı täqdim itü waqıtında Kärimovnıñ yaña kitabı Sokrates çorınnan birle fälsäfä häm äxlaq turında iñ yaxşı kitap dip ataldı.

"Bar zamannarda da yuğarı äxlaqlı şäxeslär başta üz xalqınıñ, annarı bar keşeçelekneñ ruxi citäkçe bulğan. – di Üzbäk şağire Mäxmüt Tahir. – Bu kitap ber yaqtan dönya üseşenä, ikençe yaqtan Üzbäk ileneñ häm anıñ eşçän xalqınıñ kiläçägenä küz sala."

Kärimovnıñ bu kitabı da, başqaları şikelle, uqıtu programnarına kerteler sıman. Yuğarı uqu yortlarında studentlar, nindi belgeçlek üzläşterügä qaramastan - veterinarmı ul, injenermı – yulbaşçı kitapların belergä tieş.

Bu xäl Üzäk Aziäneñ başqa respublikalarına da xas. Här türäneñ kimendä "çığışlar häm mäqalälär cıyıntığı" bar.

Qazaxstan prezidentı Nursoltan Nazarbaev distälägän fänni mäqalädän tış tağın ike kitap avtorı. Berse "Bäysezlek strategiäse", ikençese "Yewraziä yöräge" dip atala.

Taciqstan prezidentı Emomali Raxmonovnıñ taciq tarixı turında berniçä kitabı bar. Alar älegä uqıtu programına kertelmägän, läkin här türä alarnı üz bülmäsendä häm öyendä tota.

Törkmänstan prezidentı Qorbanguli Birdemöxämmädov wazıyfasına kereşep berniçä ay ütügä ilneñ sälämätlek sistemı turında berençe kitabın bastırdı.

Şulay da, bu citäkçelärneñ berse dä älegä Törkmanbaşı belän yarışa almıy. Saparmurat Niyazovnıñ Ruxnamäse xökümät urınnarında, här mäçet, çirkäwdä, bala baqçasınnan alıp universitetqa qadär uqu programına kertelgän ide. Aşğabat üzägendä bu kitapqa zur häykäl quyılğan.

Kärimov ta üz kitapların ğadi xalıqqa tağırğa tırışa. Niyazovtan ayırmalı bularaq, anıñ kitaplarında säyäsi öndäw bar.

2005 yıl Andican waqıyğalarınnan soñ ul "Üzbäk xalqı berqayçan da berkemnän dä bäyle bulmayaçaq" digän kitabın çığardı.

Ul çaqta xoquq yaqlawçılar Ändicanda yözlägän keşeneñ üleme öçen xökümätne ğayeplägän ide. Kärimovnıñ kitabı alarğa üzenä kürä cawap buldı.

Belgeçlör fikerençä, äxlaq turında soñğı kitabı belän dä Kärimov uñaysız xäldä qalırğa mömkin.

XS
SM
MD
LG