Accessibility links

сишәмбе, 6 декабрь 2016, Казан вакыты 08:51

Rusiäneñ AQŞtağı yaña tikşerenü üzäge tiräsendä kierenkelek arta. Tänqitçelär anı Kremlneñ propağanda çarası di. Üzäk citäkçese, bez amerikan demokratiäsen tänqitlärgä tügel, öyränergä kildek, di.

Demokratiä häm xezmättäşlek institutı dip atalğan bu üzäkneñ tözelüe turında iğlan itelgändä, anıñ töp maqsatı – Rusiäneñ çit illärdä abruyın kütärü, Kreml qaraşın dönyağa citkerü, Amerika häm Yewropada demokratiä torışın tänqitläw dielgän ide.

Üzäkneñ New York bülege citäkçese, tanılğan säyäsät belgeçe Andranik Migranyan Waşingtonda ütkän matbuğat oçraşuında, bez Guantanamo törmäsen yä Buşnıñ küzläw programın tikşerergä cıyınmıybız, bez bu ilne Rusiädäge problemnarnı çişü öçen öyränäbez, dide.

"Bezdä immigratsiä, integratsiä ölkäsendä citdi problemnar bar. Rusiä tağı da küpmillätle, küpdinle bula bara. – di Andranik Migranyan. - Amerikanıñ bu ölkädä ozın tarixı bar. Bez bu mäsälälärneñ monda niçek çişelüen belergä telibez."

Vladimir Putinnıñ 8 yıl idaräse waqıtında Quşma Ştatlarnıñ däwlät departamentı, Freedom House, Human Rights Watch kebek törkemnäre Rusiädäge keşe xoquqları häm demokratiä torışın daimi tänqitläp kilde.

Bu oyışmalarnıñ xisapların moñarçı gel kire qağıp kilgän Kreml, nixayät, üze dä, saqlanudan höcümgä küçergä buldı. İngliz telendä Russia Today kanalı häm menä Demokratiä wä xezmättäşlek institutı tözelde.

Russia Today xökümät aqçasına eşläsä, üzäkneñ nindi aqçağa eşläwe bilgesez. Migranyan üzäkneñ Kreml xuplawı belän tözelgänen tanısa da, aqçanıñ xökümättän tügel, ä "törle biznes oyışmalardan häm Amerika belän qızıqsınğan ximayaçelärdän" kilüen äytte.

Şul uq matbuğat oçraşuında qatnaşqan Mäskäwdäge Amerikan Universitetı prezidentı Eduard Lozanskiy xökümät aqçası turında soraw birgän amerikanğa, National Endowment oyışması wäkilenä oçıp qundı.

"Belüemçä, National Endowment üze dä nigezdä amerikan xökümäte tarafınnan finanslana. Demokratik institut ta, Respublikan institutı da şulay" di Lozanskiy.

1970-nçe yıllarda sovet xökümäten tänqitlägän öçen eşennän quılğan Lozanskiy xäzer Rusiäneñ döres yuldan baruına inana sıman. 50 yıldanmı, 100 yıldanmı, Rusiä demokratiägä barıber citäçäk, - di ul. – Aña bu yuldan barırğa qoma çawlamağız ğına.

XS
SM
MD
LG