Accessibility links

якшәмбе, 4 декабрь 2016, Казан вакыты 15:24

Tatarstanda bulıp qaytqannan soñ, Vladimir Putin premier wazıyfasında berençe çit il säfäre belän Fransiägä yul tottı. Küzätüçelär, mondıy äwzem eşçänlege belän ul xökümät tügel, il başlığın xäterlätä, di.

Kremldäge urının warisı Medvedevqa qaldırğannan birle bu Putinnıñ premier sıyfatında çit ilgä berençe räsmi säfäre bulıp tora. İke könlek säfär barışında anıñ Fransiä pemier-ministrı Fransua Fillon häm prezidentı Nicolas Sarkozy belän oçraşuı qaralğan.

Putinnıñ matbuğat wäkile Dmitriy Peskov, berençe itep näq menä Fransiäneñ saylanuın yül ayınnan bu ilneñ Yewropa Berlegendä räislek itä başlawı belän añlattı. Şulay da, Rusiä xakimiätendäge üzgäreşlärdän soñ, tışqı säyäsätne kem xäl itä, ni öçen Könbatşıqa berençe bulıp Medvedev tügel, ä Putin bara digän soraw bar.

Fransiäneñ Mäskäwdäge ilçelege süzçese Silvian Giog, Putinnıñ bu säfäre uzğan yılda, anıñ premier bulası bilgele bulğançı uq xäl itelgän ide di.

"Uzğan yılnıñ üktäberendä Mäskäwgä säfäre waqıtında Sarkozi Putinnı prezidentlıq möddäte betkäç Fransiägä kilergä çaqırdı. Putin şul çaqıruğa cawap itep kilä", - dide Fransiä räsmie.

Ämmä Putinnıñ eşçänlegen küzätep baruçı analitiklar anıñ eçke häm tışqı säyäsättä äwzemlegenä iğtibar itep, bu eşçänlek ğadi premier eşçänlegenä xas tügel, di.

"Putin üzen ilneñ çın çitäkçese itep tota, di säyäsät belgeçe Dmitriy Oreşkin. - Prezident saylawğa qadär ük Medvedevnıñ, här xäldä berençe aylarda, öyränçek bulaçağı bilgele ide. Qararlar qabul itü, xakimiätneñ üzägen üzendä qaldıru öçen Putin barın da eşläde."

Küzätüeçelär şulay uq Sarkozynıñ Putinnı Elisey sarayında mäcleskä aluın iskä alıp, bu da il başlarına kürsätelgän maxsus xörmät di. İlçelek wäkile monıñ belän dä kileşmi.

"Yuq, bu maxsus xörmät tügel. Sarkozy belän Putin ber-bersen yaxşı belä. Uzğan yıl alar prezident däräcäsendä oçraştı, alarnıñ söyläşer süzläre küp" di Giog.

Oçraşuda töp mäsälälärneñ berse energetika häm Rusiä belän Yewropa Berlege arasında partnerlıq turındağı kileşü bulır dip kötelä. Düşämbedä Berlek äğzaları Rusiä belän ike yıl buyı tuñıp torğan söyläşülärne yañartırğa qarar itte.

Monnan tış texnologiä, mädäniät, ğaläm, aeronavtika mäsäläläre qaralır dip kötelä.

Parijğa barğan räsmi törkemdä Rosatom başlığı Sergey Kirienko, Vneştorgbank häm Avtovaz wäkilläre dä bar.

XS
SM
MD
LG