Accessibility links

дүшәмбе, 5 декабрь 2016, Казан вакыты 17:41

Yewropa Berlege häm NATOğa quşılırğa cıyınğan Makedoniädä yäkşämbedä waqıtınnan alda parlament saylawı ütte. Tawış birü waqıtında xärämläşülär, xättä köç qullanular bulğan.

Saylaw komissiäse xäbär itüençä, premier-ministr Nikola Gruevski citäklägän koalitsiä tawışlarnıñ 48% cıyğan. Oppozitsiädäge sotsial-demokratlar 23% belän ikençe urında. 3-4 urınnarda ike alban partiäse – demokratlar berlege 11% häm demokratlar partiäse 10% çaması cıyğan.

Albannar yäşägän töbäklärdä şuşı ike alban partiäse tarafdarları arasında çualışlar bulğan. 22 tawış birü urınında xärämläşülär terkälgän. Bu urınnarda tawış birü qabat ütkäreläçäk. Saylawnıñ şoma ğına ütmägänen premier-ministr üze dä tanıdı.

"Bez monı Makedoniäneñ yañadan tuuı dip äytä alabız. Küp urınnarda tawış birülär ğadel häm demokratik räweştä ütte. Qızğanıçqa qarşı, qayber töbäklärdä tärtip bozular da bulğan. Koalitsiä bu urınnarda qabat saylaw ütkärü öçen barın da eşliäçäk" dide Makedoniä premierı.

Makedoniädä kiläse saylawlar 2010 yılda ğına ütäse ide. Küzätüçelär fikerençä, premier Gruevski waqıtınnan alda saylawğa barıp üz koalitsiäsenä östämä 4 yıl qazanırğa tırışa.

April ayında Buxarestta ütkän NATO sammitında Gretsiäneñ Makedoniä äğzalığına qarşı çığuı da anıñ qararına yoğıntı itkän dip sanala.

Oppozitsiädäge sotsial-demokartlar citäkçese Radmila Sekerinska Gruevskinı ciñüe belän qotlasa da, köç qullanularnı iskä alıp, "bu Makedoniägä qıymmätkä töşte" dide.

Tawış birü könendä ike köndäş alban partiäse tarafdarları arasında çualışlar bulğan, ut açu näticäsendä ber keşe hälaq bulğan.

Demokratik berlek belän demokratik partiä arasında köndşlek 2006 yıl saylawınnan soñ köçäyde. Ul çaqta albannarnıñ küpçelek tawışın cıyğan berlek Gruevski koalitsiäsennän çıqtı, demokratik partiä anda qaldı.

Demokratik berlek citäkçese Ali Äxmäti 7 töbäktä, şul isäptän albannarnıñ töp qalası Tetovoda saylaw näticäsen tanımayaçağın belderde. Häm politsiäne köndäşlärenä yärdäm itüdä ğayepläde.

Demokratik partiä citäkçese Mendu Taci köndäşenä möräcäğat itep, saylaw näticälären tanırğa çaqırdı häm oppozitsiä belän urtaq tel tabırğa wäğdä itte.

Xäzer premier Gruevski 120 urınlı parlamentta koalitsiä tözergä tieş bulaçaq. Demokratik partiä berlektän azraq tawış cıysa da, premier anıñ belän xezmättäşlekne däwam itergä teläk belderde. Küzätüçelär ike alban partiäse arasında köndäşlek tağı da artapaq dip farazlıy.

XS
SM
MD
LG