Accessibility links

шимбә, 10 декабрь 2016, Казан вакыты 15:46

Rimda azıq-tölek bäyäläre üsügä bağışlanğan konferensiä бара. 40-lap däwlät başlığı häm azıq-tölek belgeçläre bäyälärne awızlıqlaw yulların ezli.

Berläşkän Millätlär general sekretare Ban Ki-moon sişämbedä konferensiäne açıp, bu mäsäläneñ ni qadär citdi ikänlegen añlatırğa tırıştı:

"Dönyada moñarçı da 850 million keşe azıq-tölek qıtlığı kiçerä ide. Dönya bankı xisabına qarağanda bu san tağın 400 millionğa arta ala. İñ yarlılar keremeneñ 2/3-sen azıq-tölekkä sarıf itä. Alarğa bigräk tä awır bulaçaq".

Berläşkän Millätlär general sekretare üze kürgän ber misal da kiterde:

"Min monı üz küzem belän kürdem. Küptän tügel Liberiädä minem belän oçraşqan keşelär moñarçı dögene qapçıqlap alğan bulsa, xäzer uçlap ala" dide.
Ban Ki-moon çığış yasıy

BMO citäkçese süzlärençä, azıq-tölek qıtlığı artta qalğan illärdä çualışlarğa da kiterä ala. Andıy xällärneñ inde bulğanı da bar.

Rimda barğan konferensiädä meñgä yaqın keşe qatnaşa. BMO räsmiläre, xökümät citäkçeläre, belgeçlär yarlılarğa yärdäm itü yulların ezli.

Ämmä bu ciñel eş tügel. Çönki bäyä üsüneñ säbäpläre berniçä: aşlıq uñmaw, klimat üzgärü, energiä qıymmätlänü, bazardağı spekulyatsiä, nicayät, bio-energiä citeşterü.

"Awıl xucalığı awır çor kiçerä. Bäyälär soñğı 30 yılda iñ yuğarı däräcägä citte. Klimat üzgärä, bio-energiägä moxtaclıq arta. Şuña kürä, dönyada açlıq mäsäläsen xäl itergä teläsäk, azıq-tölek iminlege, yuğarı bäyälär, klimat üzgärü, bio-energiä – barısın bergä alıp qarağa kiräk" - di konferensiäne oyıştıruçılarnıñ berse Aleksandr Müller.

Kileşügä ireşü öçen xökümät citäkçeläre üz-ara bulğan qarşılıqların çitkä quyarğa tieş bulaçaq. Misal öçen, bio-yağulıqqa qarşı buluçılar Könbatış illären aşlıqnı yağulıqqa äyländerüen tuqtatırğa taläp itä. Könbatış illär isä, kiresençä, neft häm gaz bäyäläre üskän wazğıyättä, näq menä bio-yağulıq yärdäm itä ala dip sanıy.

Moña östäp äle tağın säyäsi qarşılıqlar da bar. Äytik, bu konferensiä eşendä İran prezidentı Mäxmüt Äxmädinecad, Zimbabve prezidentı Robert Mugabe kebek citäkçelär da qatnaşa.

XS
SM
MD
LG