Accessibility links

якшәмбе, 4 декабрь 2016, Казан вакыты 07:01

AQŞnıñ elekke berençe xanımı Hillary Clinton prezidentlıq öçen köräştän çığa. Şimbä könne ul firqädäşe Barak Obamağa xuplawın belderäçäk. Ciñelsä dä, Clinton tarixqa kerep qala.

Bu mizgelne demokratlar berniçä atna kötte. Hillary Clinton firqadäş köndäşe Barak Obamağa ottıraçağın añlasa da, çigenergä telämäde, axırına qadär köräşte. Waqıt-waqıt bu köräş şaqtıy qızu tösmer aldı.

"Küplär bu kampaniäneñ däwam itüen telämäde, ğinwardan birle mine tuqtatırğa tırıştı. Läkin xalıq alarğa üç itep miña tawış birde" di Hillary Clinton.

Läkin şuşı atnada Obama namzät bulır öçen kiräk bulğan 2118 delegat tawışın cıyğannan soñ, Hillary xanımğa başqa çara qalmadı. Pänceşämbe irtäsendä taratqan xatında ul Obama faydasına köräştän çığuı turında şimbä könne räsmi iğlan itäçägen belderde.

Demokratlar partiäse räsmiläre xäzer ciñel sulap quya ala. İke demokrat arasında barğan eçke köräş partiägä faydağa tügel ide. Hillary xanım çigenep, demokratlarnıñ qızu köräşenä noqta quydı.

Kampaniä başında bu bäygene Clinton ciñer dip farazlanğan ide. Ğinwar ayında İowa ştatında ütkän berençe saylawda ul Obamağa ottırdı. Berniçä könnän New Hamshire ştatında ciñep çıqtı.

Alğa taba köräş şulay, äle berseneñ, äle ikençeseneñ ciñüe belän däwam itte. Läkin Obama üzeneñ ömet tulı yalqınlı çığışları belän saylawçını aqrınlap üz yağına awdardı.

"Ägär sez irtägä miña tawış birsägez, min sezgä wäğda itäm, - di Barak Obama, – bez namzätlekne, annarı prezidentlıqnı ciñep kenä qalmayaçaqbız. Sez häm min bergäläp bu ilne üzgärtäçäkbez. Bez bar dönyanı üzgärtäçäkbez."

Köräş barışında köndäşlär küp xatalar da cibärde. Misal öçen, Hillary xanım 1996 yılda Bosniägä kilgäç, oçqıçtan töşkäç, märgännän qaça-qaça maşinağa yögerüen söyläde. Axır çiktä bu uydırma bulıp çıqtı. Hillary xanım xatasın tanırğa mäcbür buldı.

Barak Obama üzeneñ küptänge ruxaniı rasaçıl belderülär yasağannan soñ, annan baş tartırğa mäcbür buldı.

Clinton soñğı tapqır Könyaq Dakotada şaqqattırdı. Ber jurnalist, ni öçen sez haman çigenmisez dip sorağaç, xäterlisezme, 1968 yılda Yun ayında ul çaqtağı namzät Robert Kennediğa höcüm yasalğan ide, yänäse, dönya xälen belep bulmıy digän işaräse belän küplärne xäyran qaldırğan ide.

Şulay da, ciñelüenä qaramastan, küzätüçelär fikerençä, Hillary xanım barıber tarixqa kerep qalaçaq. Xäzer kiläse xatın-qızğa prezidentlıq öçen köräşü ciñelräk bulaçaq.

Annarı säyäsät şundıy närsä - bügenge köndäş, irtängä tarafdarğa äylänergä mömkin. Hillary Clinton vitse-prezident yä isä başqa berär urınğa däğwa itergä mömkin.

Äle barısı da alda.

XS
SM
MD
LG