Accessibility links

дүшәмбе, 5 декабрь 2016, Казан вакыты 03:30

11 sentäber höcümnären oyıştıruda şiklänelgän 5 keşe xärbi mäxkämä aldına bastı. Ğayeple dip tabılsalar alarğa ülemgä xökem itelü yanıy.

2001 yılda New York häm Waşingtonğa höcümnär oyıştıruda şiklänelgän bu 5 keşeneñ inde yıllar buyı cämäğatçelekkä kürengäne yuq ide. Höcümnärne baş oyıştıruçı sanalğan Xalid Şäyx Möxämmäd, oçqıçlarnı urlağan Möxämmä Attanıñ elekke bülmädäşe Rämzi Binalşib, Ali Äl-Aziz Ali, Wälid bin Attaş häm Mostafa Äl-Hawsawi. 3 yıl küzläw idaräse törmäsendä utırğannan soñ 2006nıñ sentäberendä bu keşelär Guantanamoğa kiterlde.

Baş xärbi prokuror Lawrence Morris süzlärençä, bu tıñlawlar amerikan xärbiläreneñ qanunğa tuğrılığın kürsätä.

"Kürüegezçä, bu açıq häm ğadel process, Quşma Ştatlarnıñ başqa mäxkämäläre şikelle. Prokuratura törkeme şul räweştä, xärbi häm sivil mäxkämälärneñ iñ yaxşı ürnägendä eşläwen däwam itäçäk" dide baş xärbi prokuror.

Pänceşämbe utırışında ğayeplänüçelärneñ bişese dä advokatlardan baş tarttı, üzlären üzläre yaqlayaçağın belderde. Ğayeple dip tabılğan oçraqta alarğa ülemgä xökem itelü yanıy. Öçese bu xökemne xuplap qarşı alaçağın häm şähit bulaçağın äytkän.

Tıñlawda bulğan jurnalistlar äytüençä, ğayeplänüçelär üzlären ber tınıç, ber höcümçän totqan, üz-ara söyläşep utırğan, xökemdarnı berniçä tapqır bülgän.

Baş ğayeplänüçe Möxämmäd soraw alu waqıtında üzenä qarata cäzalawlar buluın äytte.

Küzläw idaräse Möxämädtän soraw alu waqıtında xoquq yaqlawçılar tarafınnan tänqitlängän suğa batıru ısulı qullanılğanın tanıdı.

Advokatlar köç qullanıp soraw alunıñ här oçrağına şikäyät birergä äzerlegen belderde. Ämmä ğayeplänüçelär advokatlardan baş tartqan xäldä monı eşläw awır bulaçaq.

Äl-Hasawinıñ advokatı mayor Jon Jackson ğayeplänüçelärgä üz-ara söyläşergä röxsät itkän öçen mäxkämägä tänqit belderde. Jackson süzlärençä, anıñ möştärienä advokattan baş tartırğa dip iptäşläre basım yasağan.

"Bügen tıñlawlar bülmäsendä bulğan xäl ul mäxkämä tügel, bu - kölke. Bolay äytüemneñ säbäbe – minem möştäri belän bulğan xäl" dide Äl-Hasawi advokatı.

Mäxkämä utırışı Sentyabrneñ 15ndä bilgelängän.


XS
SM
MD
LG