Accessibility links

шимбә, 3 декабрь 2016, Казан вакыты 14:45

►Üzäk party - tatar muzıkası kiçäse ►Tatarnı mısqıllağan kitap haman mäxkämä yulında ►“İxlas” mäxälläse quät strukturaların ğäyepli ►Islam bankları bazarda yaña yünäleşlär aça ►Udmurtia häm Tatarstan fikere urtaqmı?


--------------------------------------------------------------------------------------------

►Üzäk party - tatar muzıkası kiçäse

ITTIFAQ, Nurbäk Batulla, Mäskäwdän kilgän dizayner İldar Kärim (Creative Studio) Üzäk party tatar muzıkası kiçäsen yasıy.

Şimbä könne Qazanda ITTIFAQ rep-törkeme häm biüçe Nurbäk Batulla, Mäskäwdän Qazanğa kilgän dizayner İldar Kärim (Creative Studio) Üzäk party tatar muzıkası kiçäsen yasıy.


Çara “Mayakovskiy. Sarı qofta” klubında uza. Anda “tozlı kansirt” häm İldar Kärimneñ “peşmägän fotoräsemnär kürgäzmäse” dä bulır dip kötelä. Şulay uq milli rep proektı T&B ("Tatar balası") da çığış yasayaçaq.


--------------------------------------------------------------------------------------------

►Tatarnı mısqıllağan kitap haman mäxkämä yulında


6 sıynıf öçen A. Preobrajenskiy häm B. Rıbakov tarafınnan yazılğan “İstoria Oteçestva” digän däreslek yaqın arada tağın Mäskäw mäxkämäsendä qarala.

Bilgele bulğança, uzğan yılnıñ yün ayında Çallıda yäşäwçe Rifqat Säğıydullin, Faik Taciev häm Mönir Sitdiqov şuşı tarix däreslege tatar xalqın xurlıy, kimsetä dip, mäxkämägä möräcäğät itkännär ide. Alar ayıruça bu kitapta tatarlarnıñ uçaqta keşe qızdırunı sürätlägän räsemgä basım yasadılar. Mäskäwdä uzarğa tieşle mäxkämä 3 tapqır kiçekterelde.



--------------------------------------------------------------------------------------------

►“İxlas” mäxälläse quät strukturaların ğäyepli

"İxlas" mäçeten manarası - elekkege miçneñ töten torbası
Taşlandıq "kotelnyada" eşläwçe "İxlas" mäçete mullası Röstäm Safinğa qanığunı tuqtawnı sorap möselmannar möräcäğät itä.

"İxlas" mäçeten mäxällä keşeläre tirä-yaqtağı islamofoblar belän köräşep, iske cılıtu punktınnan yasadı bu mäçetne. Manarası - elekkege miçneñ töten torbası. Bu mäçet yanında tuplanğan ölkännär häm yäşlär üzlären dus häm qardäş ruxtağı, ğädellek söyüçän mäxällä dip sanıy.

--------------------------------------------------------------------------------------------

►Udmurtia häm Tatarstan fikere urtaqmı?

Udmurtia parlamentı räise Aleksandr Solovyev (uñda) Tatarstanğa häryäklap yärdäm wäğdä itä

Udmurtia parlamentı başlığı milli töbäk komponentın qaytaru turındağı Tatarstan tözätmäsen yaqlap çığarğa wäğdä itä.

Tatarstan däwlät şurası räise Färit Möxämmätşin Udmurtia parlamentı wäkilläre belän oçraşuda häm soñınnan matbuğat çaraları aldında da milli töbäk komponentınıñ beterelüe turındağı mäsäläne telgä aldı. Däwlät Şurasınıñ qanunğa tözätmälär äzerlägänen äytte häm qunaqlarğa, bu qanuni başlanğıçqa teläktäşlek kürsätergä sorap möräcäğät itte.


Belgänegezçä, "Mäğärif turında"ğı federal' qanunğa täqdim itelgän bu tözätmälär töbäk parlamentları tarafınnan da yaqlaw tabırğa tieş.

Milli komponentnı qaytaru yünäleşendä yasalğan yaña adımnar turında matbuğat oçraşuında Färit Möxämmätşin äytte. Ul bu könnärdä Qazanda bulğan Rusiä prezidentınıñ İdel buyı federal' bülgesendäge wäkile Griğöriy Rapotağa komponent mäsäläsendä doqumentlar tapşırğanın xäbär itte.

Udmurtia häm Tatarstan parlamentları citäkçeläre imzalağan yañartılğan kileşüneñ ber matdäse şul xaqta ide. Anda ike yaqta ta, tel, belem alu häm milli-mädäni ixtiäcların qänäğätlänederügä, Tatarstanda udmurtlarnıñ milli-mädäni möxtäriäte häm Udmurtiadäge tatar-milli möxtäriäte çaralarına yärdäm itergä wäğdä itä, dip äytelä.



--------------------------------------------------------------------------------------------

►Islam bankları bazarda yaña yünäleşlär aça


Islam qanunnarına nigezlänep eşläwçe banklar dönya bank sistemasınıñ ber öleşenä äylänä bara häm investisia öçen yaña ber yünäleş bularaq açılıp kilä, di belgeçlär

Qazanda da bu könnärdä, islamça finanslaw üzençälekläre turında xalıqara uqular bara, kiläse atna başında, Yaqın Könçığıştan, ğäräp illärennän islam bankları citäçeläre qatnaşlığında zur qorıltaynıñ ütüe kötelä. Islamça bank sistemasınıñ östenlekle yaqları häm citeşsezlekläre nidä?

Islam bankına aqça salğan keşelär, prosent urınına, tabış häm yuğaltularnı büleşü turındağı kileşüne imzalıy. Belgeç Abdul Ğafur bu xaqta bolay di :
“Küp keşe mondıy tärtip belän kileşmi. Bu qurqınıçlarnı häm tabış, yuğaltularnı büleşü kileşüe. Ämma bu ğädi äyber tügel. Bu äyber eşlämi, äşläsä dä ber yaqlı ğına tormışqa aşa ( aqça kertüçegä zıyanğa bula ala)”

Bu islam bankların ğädäti bank belän çağıştırğanda otışsızraq itä. Ğädi Könbatış banklarına tağın däwlät dä aqçalarnı imin saqlaw yünäleşendä yärdäm kürsätä.

Ägär bank aqçaların kertkän şirkät, bankrotqa çığa ikän, aqçalarnı banka birep torğan keşe böten baylığın yuğalta ala.
XS
SM
MD
LG